Mradi wa Kizazi Hodari watambulishwa Mwanza

Posted on: November 21st, 2023

Mradi wa Kizazi Hodari watambulishwa Mwanza

Serikali  kupitia OR- TAMISEMI kwa kushirikiana na Kanisa la Kiinjili la Kilutheri Tanzania (KKKT) Makao Makuu Arusha, limetambulisha mradi wa USAID Kizazi Hodari Mkoani Mwanza ambao umelenga kuwafikia watoto 64,266.

Akizungumza jijini Mwanza leo wakati akitambulisha mradi huo Kiongozi wa Mradi wa  USAID Kizazi Hodari Kanda ya Kaskazini Mashariki, KKKT Makao Makuu Arusha, Dk. Godson Maro, amesema lengo kubwa la mradi  huo ni kuboresha afya,ustawi na ulinzi kwa watoto walio katika mazingira hatarishi na vijana walio katika maeneo ambayo yana maambukizi ya juu ya virusi vya ukimwi.

Dk.Maro amesema kwamba wanatekeleza mradi huo wa miaka mitano ulioanza Aprili Mosi ,2022 Mkoani Arusha na Kilimanjaro  kwa ufadhili wa Shirika  la Marekani la Maendeleo ya Kimataifa(USAID) ambao utagharimu dola milioni 27.4 unaotarajia kukamilika Machi 31, 2027 ukiwa umewafikia walengwa katika mikoa mingine sita ambayo ni Dodoma,Singida, Manyara, Geita, Mara na Mwanza.

 “Katika Mkoa wa Mwanza mradi huu umelenga kuwafikia watoto 64,266 wanaoishi katika mazingira hatarishi ambao wameathirika au kuathiriwa na virusi vya ukimwi kwa ajili ya kuwaunganisha na huduma za tiba ambazo zitawasaidia kufubaza virusi vya ukimwi,  tunawapa elimu ya kujitambua  pamoja na huduma zingine  jumuishi,”amesema Dk. Maro na kuongeza

“Walengwa wa mradi huu ni watoto wenye umri wa miaka 0 hadi miaka 17, pia tutatambua kaya maskini zenye uhitaji na kuziunganisha kwenye vikundi mbalimbali vya maendeleo  ili viwasaidie kuongeza kipato cha kaya waweze kuwahudumia watoto wenye.

 maambukizi,”amefafanua

Afisa Ustawi wa Jamii kutoka  OR-TAMISEMI Mariam Nkumbwa, ametoa rai kwa watu wote watakaohusika katika kutekeleza mradi huo kuwajibika na kufanya kazi kwa kushirikiana ili malengo ya mradi huo yatimie kwa ufasaha.

“Matarajio ya OR- Tamisemi kwenye mradi huu ni kuona matokeo yote chanya yaliyoainishwa yanatekelezwa kama kutekelezwa kama yalivyopangwa, tunaamini wakati wa utekelezaji  wa miradi huwa kuna changamoto mbalimbali zinajitokeza, tunaouzoefu kupitia miradi mbalimbali tuliyokwishaitekeleza lakini tukifanya kazi kama timu tutashirikiana ili kuzitatua,”amesisitiza.

Awali akizungumza na wadau wanaotekeleza mradi huo ofisini kwake,  Katibu Tawala Mkoa wa Mwanza, Balandya Elikana alisema uongozi wa mkoa huo utashirikiana nao kuhakikisha kuwa malengo ya mradi yanafikiwa.

Afisa Ustawi wa Jamii Mkoa wa Mwanza, Faithmary Lukindo amesema mradi huo utasaidia watoto wenye maambukizi ya Virusi vya Ukimwi kutokushindwa kwenda shuleni kutokana na kusumbuliwa na magonjwa nyemelezi kwa sababu watakuwa na afya nzuri kutokana na kufuata ufuasi mzuri wa dawa  pia watawasaidia kupatikana kwa vifaa saidizi pamoja na vifaa vya shuleni ili wasikose masomo.