RC MTANDA ATOA WITO KWA COPRA KULETA MAGEUZI CHANYA MAZAO MCHANGANYIKO

Posted on: January 8th, 2025

RC MTANDA ATOA WITO KWA COPRA KULETA MAGEUZI CHANYA MAZAO MCHANGANYIKO

Mkuu wa Mkoa wa Mwanza Mhe. Said Mtanda leo Januari 8, 2025 amefanya mazungumzo ofisini kwake na uongozi kutoka Mamlaka ya udhibiti wa nafaka na mazao mchanganyiko (COPRA) na amewataka kuleta mageuzi chanya kwenye mazao inayosimamia.

Ujumbe huo ukiongozwa na Mkurugenzi wa Taasisi hiyo mpya iliyopo chini ya Wizara ya Kilimo, bi. Irine Mlola katika mazungumzo na mwenyeji wao umeombwa kuhakikisha inawaleta wataalamu bora ambao wataongeza tija ya mazao yaliyokusudiwa ambayo ni nafaka na jamii ya mikunde.

"Hongereni kwa kuja na mpango huu mzuri maana tangu miaka ya nyuma tulikuwa tunasikia mazao ya biashara na chakula, lakini ukweli ni kwamba sasa kilimo chote ni biashara hayo mazao yaliyokosa usimamizi naamini yataingia kwenye mnyororo wa thamani," RC Mtanda.

Aidha, Mkuu huyo wa Mkoa ameihakikishia Taasisi hiyo kwa kushirikiana na Ofisi yake kuwakusanya wadau wa mazao ya nafaka na mikunde ili kuwajengea uelewa wa taasisi hiyo na makusudi yake kwenye kilimo hicho kwa ujumla.

"Mhe. Mkuu wa Mkoa lengo la ujio wetu kwanza ni kujitambulisha na kukufahamisha majukumu ya taasisi hii ambayo ilianzishwa mwaka 2023 na kuanza rasmi kazi mwaka jana, kusimamia shughuli za masoko kwa mfumo wa stakabadhi gharani kwa mazao 5-6 yakiwemo Kokoa, Ufuta, Soya, Mbaazi, Dengu na mwaka huu 2025 tumeongeza zao la Choroko", Irine Mlola, Mkurugenzi COPRA.

Uongozi huo umepita mikoa ya kanda ya ziwa na jirani kwa lengo la kuitambulisha Taasisi hiyo na kufungua Ofisi zao.