RC Mwanza aendelea kuwakaribisha Wananchi wa Mwanza Jumamosi hii katika muendelezo wa utambulisho wa Filamu ya ROYAL TOUR

Posted on: June 16th, 2022

Mkuu wa Mkoa wa Mwanza Mhe Injinia Robert Gabriel ameendelea kuwaalika  wananchi wa Mkoa huo kushiriki Utambulisho rasmi wa Filamu ya Royal Tour kwenye viwanja vya Rock City Mall itakayotanguliwa na burudani za ngoma na wasanii Jumamosi ya Juni 18, 2022 kuanzia saa 9 alasiri.

Ametoa salamu hizo leo kwa niaba yake Mkuu wa Wilaya ya Misungwi Mhe Veronica Kessy alhamisi ya Juni 16, 2022 akiwa kwenye hifadhi ya Taifa ya Serengeti alipowaongoza wananchi zaidi ya 150  waliofika kwenye hifadhi hiyo kuangalia wanyama na vivutio vya Utalii.

"Baada ya Uzinduzi wa Filamu hii nchini Marekani na baadae hapa nchini, Mhe Waziri Mkuu ametoa maagizo ya kuzindua filamu hii mikoani hivyo katika kuelekea kwenye kuizindua rasmi filamu hiyo tumeanza kwa kufanya utalii wa ndani hapa Serengeti na kesho tutatembelea vivutio ndani ya Mkoa wa Mwanza na jumamosi sasa itakua ndio siku rasmi ya Utambulisho." Mhe Kessy.

"Nawakaribisha wananchi wote wa Mwanza kwenye viwanja vya Rock City Mall siku ya Jumamosi kwa ajili ya kutazama filamu ya Royal Tour tuone namna gani mama ameitangaza nchi yetu lakini vilevile Utamaduni wa watu wa Mwanza utaoneshwa pale," amebainisha.

"Tunampongeza Mhe Rais kwa kufanya filamu ya ROYAL TOUR kwani imesaidia kuongeza watalii nchini na kwa wananchi inawapa fursa moja kwa moja kunufaika kupitia kutoa huduma kama za chakula na imesaidia kuwaonesha watanzania kuwa Hifadhi zetu ni za kujivunia." Mhe. Jonas Lufungulo Mwenyekiti wa UVCCM Mkoa wa Mwanza.

"Sisi kama Serengeti tumefurahi sana kupokea ugeni huu mkubwa na haya ni matunda ya Filamu aliyoifanya Mhe Rais mwenyewe kwenyewe Hifadhi mbalimbali nchini ikIwemo hii na kwakweli katika kipindi cha janga la Uviko wageni na pato la serikali lilishuka kupitia Utalii lakini hivi sasa wameongezeka kwa wingi." Regius Komba Mhifadhi mwandamizi

"Hali ya utalii wa ndani baada ya filamu ya Royal Tour ni kwamba imekua zaidi kama hivi leo tumepokea zaidi ya watalii 150 kwenye ukanda huu wa magharibi mwa Serengeti, na hifadhi yetu imeongoza miaka mitatu mfululizo kuwa Hifadhi Bora na Mwaka huu inawania tena nafasi hiyo hivyo nawaomba watanzania wapige kura kupitia tovuti ya Best African Travel Awards." Ameelezea Bwana Komba.