SEKTA YA MICHEZO NCHINI IMEKUA KWA 18%- DKT BITEKO

Posted on: September 7th, 2025

Naibu Waziri Mkuu na Waziri wa Nishati Mhe. Dkt. Doto Biteko amesema tasnia ya burudani ambayo michezo ipo ndani yake imeendelea kukua kwa kasi kubwa na kuchangia Pato la Taifa na kuongeza ajira nchini ambapo 2022/23 ilikua kwa asilimia 15 na mwaka 2023/24 kwa asilimia 18.

Mhe. Biteko ameyasema hayo mapema leo tarehe 07 Septemba, 2025 wakati akizindua rasmi Mashindano ya Shirikisho la Michezo ya Wizara na Idara za serikali (SHIMIWI) kwa Mwaka 2025 katika uwanja wa CCM Kirumba wilayani Ilemela Mkoani Mwanza.

Mhe. Biteko amesema watumishi nchini ni sehemu ya kukua kwa sekta hiyo kupitia SHIMIWI kwani wamekua wakiwakusanya maelfu ya wachezaji katika kushindana na kujenga ari ya kimichuano wakati wote hivyo wamekua wakiichagiza jamii kuthamini michezo na kuruhusu hata vijana kushiriki.

Aidha, ametoa wito kwa viongozi wa Shirikisho hilo kusimamia mazoezi ya awali kwa ajili ya kuwaandaa kiakili pamoja na upimaji wa afya kwa wachezaji kwa kutumia taasisi za afya nchini ili kupata wachezaji wenye afya bora na kuwaepusha na maradhi ya ghafla wakati wa michuano.

Akitoa salamu za Mkoa, Mkuu wa Mkoa wa Mwanza Mhe. Said Mtanda ameishukuru Serikali kwa kuufanya mkoa huo kuwa Kitovu cha Michezo kwa kuwekeza katika michezo ambapo inajenga Kituo cha Kulea Vipaji katika Chuo cha Michezo Malya kwa zaidi ya Bilioni 31.

Aidha, ametumia wasaa huo kuwaalika tena SHIMIWI na Mashirikisho mengine kufanya mashindano yao Mkoani Mwanza kwani ina miundombinu rafiki ya viwanja vya michezo, malazi pamoja na maeneo ya vivutio vya utalii na maeneo nadhifu ya kupumzika hususani kwenye fukwe za ziwa Victoria.

Katibu Mkuu Wizara ya Habari, Sanaa, Utamadini na Michezo Bw. Gerson Msigwa amebainisha kuwa mashindano hayo kwa kipindi cha miaka mitano mfululizo hayajasimama na ameahidi wizara hiyo kuendelea kusimamia michezo hiyo ikiwa ni pamoja na kusimamia haki ili mshindi apatikane kihalali.