Binti wa Aga Khan atua Mwanza na kuahidi kutangaza Vivutio vya Utalii

Posted on: April 25th, 2023

Mkuu wa Mkoa wa Mwanza Mhe.Adam Malima  leo Aprili 25,2023, akiwa ameambatana na Wajumbe wa Kamati ya Ulinzi na Usalama ya Mkoa huo wamempokea Binti wa Mfalme Aga Khan, Zahra Aga Khan  ambaye amewasili kwa ajili ya Ziara ya Kikazi ya siku mbili atakayoihitimisha Aprili 26,2023.

Binti wa Mfalme Zahra Aga Khan akiwa jijini Mwanza atatembelea na kukagua  miradi mbalimbali ya Afya wanayoifadhili na kuitekeleza.

Akizungumza baada ya kuwasili Uwanja wa ndege wa  jijini Mwanza Binti Mfalme Zahra ambaye pia ni Mwenyekiti wa Shughuli za Afya na Elimu  katika Taasisi ya Aga Khan amesema  yuko kwenye ziara ya siku saba kwa ajili ya kukagua miradi mbalimbali ya Elimu na Afya ambayo Taasisi hiyo inaitekeleza katika nchi za Tanzania, Kenya na Uganda.

"Nimefurahi sana Mwenyezi Mungu kunipa kibali cha kufika  tena hapa Mwanza, nakumbuka nilikuwa hapa miaka kumi iliyopita, asanteni kwa mapokezi mazuri, nikiwa Zanzibar juzi pia nilipokelewa vizuri sana wamenipa mwaliko wa kurudi Zanzibar," amesema Zahra.

"Nakushukuru sana  Mkuu wa Mkoa kwa mapokezi haya, nitashirikiana na Serikali ya Mkoa wako kutangaza vivutio vya utalii vilivyopo mkoani kwako ili Mkoa huu uwe kitovu cha Utalii Afrika Mashariki na kati,"ameahidi Binti Mfalme Zahra.