Chanzo cha Umaskini wa wakulima ni sera ya Kilimo inayofanyiwa kazi - Bashe

Posted on: August 4th, 2019

Serikali imesema  sera iliyopo ya sekta ya kilimo inayotumika kwa sasa  ndiyo cha chanzo cha wakulima kuwa masikini kutokana na kuwatumikisha  wananchi kuilisha nchi na  matajiri huku wakiwa wanakabiliwa na changamoto kubwa.

Kutokana na hali hiyo, imesema sera hiyo imepitwa na wakati ambapo wizara ya kilimo  imelazimika kuanza kuipitia upya  na kuondoa  changamoto  na vikwazo kwa wakulima  ikiwa lengo ni kuihuisha  sekta hiyo kutoka kilimo cha kujikimu na kuwa cha biashara kwa kuruhusu uwepo wa uwekezaji mkubwa.

Kauli hiyo imetolewa  na Naibu Waziri wa Kilimo, Hussein Bashe  wakati akifungua sherehe za wakulima  na maonyesho ya kilimo (Nanenane) katika viwanja vya Nyamhongolo mkoani Mwanza ambapo alipiga marufuku viongozi kuwazuia wakulima kuuza chakula chao kwa kuhofia uwepo wa njaa.

Bashe alisema kila mkulima anajua namna anavyotunza  na kuilisha familia yake hivyo  kama kuna kiongozi anahofia uwepo wa njaa ni vema  akanunua mazao hayo  kwa bei anayotaka mkulima na kuyatunza ili yaweze kusubiria dhana aliyoiweka kichwani kwake kwamba kutakuwapo na uhaba wa chakula.

“Hatuwezi kujenga viwanda wakati wakulima ni masikini wa kutupwa, ni lazima tuwawezeshe kwa kutengeneza mazingira ya watu kunufaika na kilimo chao sambamba na kuwa na soko la uhakika, ndio maana leo hii kama wizara tumeanza kupitia sera ya kilimo na kuondoa changamoto  na  vikwazo vilivyokwekwa .

“Sera iliyopo imepitwa na wakati  kabisa,  inawaumiza wakulima   na kuwafanya kubaki  kila mwaka kuilisha nchi na matajiri huku wao wakibaki na umasikini wao  huku kukiwapo na utitiri wa taasisi nyingi ambazo ukichunguza zimeanzishwa kwa lengo la kuwakandamiza wakulima, hii haiwezekani kama wizara tumeanza kuangalia ni taasisi gani zinatkiwa  kufutwa na kubaki  chache .

“Fedha ambazo zilikuwa zikielekezwa kwenye utitiri wa taasisi hizo, zitaelekezwa katika mfuko maalum  amboyo  Wizara tunatarajia kuanzisha  na kazi ya mfuko huo ni kufidia mkulima pale inapotokea mtikisiko wa bei katika soko la dunia, kama serikali hatuna uwezo wa kuthibiti bei ya soko la dunia lakini mfuko huo ndio utakaokuwa na kazi ya kutafuta pesa kwa ajili ya kuwafikia wakulima,”alisema.

Bashe alisema kama Serikali ilikuwa ikipokea fedha nyingi kutoka mataifa ya nje ili kuendeleza kilimo lakini zilikuwa zikiishia katika semina mafunzo kwa  watendaji huku  asilimia 50 ya fedha zilizokuwa zikipokelewa ndizo  zinafika kwa wakulima, hivyo wizara imeanza uchunguzi wa matumizi hayo.