MAMILIONI YA RC MAKALLA KWA PAMBA JIJI FC KUANZA KUMWAGIKA LEO

Posted on: March 30th, 2024

MAMILIONI YA RC MAKALLA KWA PAMBA JIJI FC KUANZA KUMWAGIKA LEO

*RC Makalla ahimiza ushindi mfululizo mechi 4 zilizobaki

*Pamba Jiji kuvuna mapesa dhidi ya Maafande wa Polisi Tanzania

*Mashabiki watakiwa kuujaza uwanja wa Nyamagana kuwapa ari Pamba Jiji

Timu ya soka ya Pamba Jiji FC leo Machi 30,2024 inatupa karata nyingine muhimu katika michuano ya ligi ya Championship kwa kuwakaribisha Maafande wa Polisi Tanzania na kuanza safari ya kuoga mapesa ya mkuu wa mkoa wa Mwanza Mhe.CPA.Amos Makalla kwa kila goli kununuliwa kwa shs milioni moja.

Mapema wiki hii Makalla ambaye ni mlezi wa timu hiyo kipenzi cha wana Mwanza inayoshikilia nafasi ya pili na mtaji wa alama 55, aliwatembelea mazoezini uwanjani Nyamagana na kuwapa mikakati yote ya ushindi na kuwatahadharisha kuepukana na njama zozote chafu zitakazo fanywa na wapinzani wao kwa michezo yao iliyosalia.

Mkuu huyo wa mkoa katika mazungumzo hayo aliwaongezea hamasa wachezaji wa Pamba Jiji kwa kuwatangazia kununua kila goli shs milioni 1 michezo yao minne iliyosalia kauli iliyopokelewa kwa shangwe na wachezaji hao.

"Mmenifurahisha sana na matokeo ya michezo yenu iliyopita na  sasa tupo nafasi nzuri na nimeruhusu bonasi itolewe ya shs milioni 5.2,ila msibweteke kazeni buti ongezeni kiwango dimbani kila mechi mbele yetu iwe kama fainali,"amehimiza mlezi huyo.

Amebainisha timu zinazonyemelea nafasi za kufuzu kucheza ligi kuu msimu ujao hazipishani sana alama na Pamba Jiji hivyo kinachotakiwa sasa ni kuhakikisha wanashinda ili kuzidi kuwatimulia vumbi wapinzani wao.

Nahodha wa timu hiyo na mchezaji mkongwe Jerryson Tegete amemuhakikishia mlezi wao kuwa wamejipanga vizuri kwa michezo yao iliyosalia kwani tayari taa ya endiketa ya kucheza ligi kuu wameshawasha hivyo wana Mwanza wazidi kuwaunga mkono.

Baada ya mchezo wa Jumamosi hii dhidi ya Polisi Tanzania inayoshikilia nafasi ya 8 yenye alama 35, Pamba Jiji FC maarufu kama TP Lindanda wataendelea kusalia dimba lao la nyumbani ambapo Aprili 14,2024 watamenyana na timu ya FJ Talent kutoka Ruvuma kabla ya kuwafungia safari Arusha timu ya TMA mchezo utakaopigwa Aprili 28,2024