Menejimenti wa watumishi Mwanza yawaaga watumishi wawili wanaohama

Posted on: July 10th, 2023

Menejimenti wa watumishi Mwanza yawaaga watumishi wawili wanaohama*

Leo Julai 10, 2023 Ofisi ya Mkuu wa Mkoa wa Mwanza imewaaga watumishi wake wawili ambao siku za hivi karibuni wamepata Uhamisho kwenda kuwatumikia wananchi kwenye taasisi zingine.

Watumishi walioagwa kwenye hafla fupi iliyofanyika kwenye Ukumbi wa Ofisi ya Mkuu wa Mkoa ni pamoja na Joachim Otaru aliyekuwa Katibu Tawala Msaidizi Mipango na Ufuatiliaji ambaye amehamia Wizara ya Mambo ya Nje na Abdul Mzee aliyekua Mkuu wa kitengo cha TEHAMA ambaye amehamia NSSF.

Akizungumza kwa niaba ya Katibu Tawala Mkoa, Katibu Tawala Msaidizi Utumishi na Rasilimali watu Daniel Machunda amewashukuru watumishi hao kwa kujitoa kwa dhati kwenye kazi na ametoa rai kwao kwenda kuendeleza uchapakazi na kuwa mabalozi wa kuisemea vizuri Mwanza huko waendako.

"Kwakweli maelekezo ya Viongozi wangu (RC na RAS) yamekua msaada mkubwa kwangu katika kufanikisha malengo ya Mkoa na vilevile nawashukuru sana Menejimenti na Watumishi wote wa Ofisi ya Mkuu wa Mkoa wa Mwanza kwa kushirikiana nami na nawaomba nanyi kuendelea kufanya kazi kwa ushirikiano mkubwa sana na Mwenyezi Mungu awabariki sana." amesema Joachim Otaru.

"Miaka minne niliyokaa hapa nimepata uzoefu mkubwa zaidi ya miaka tisa niliyokaa nilikokua siku za awali kwani hapa kuna ushirikiano mkubwa sana na kwakweli nawashukuru sana Viongozi wangu na watumishi wenzangu maana nilikua kama daraja la kufanikisha maendeleo yaliyokusudiwa kwa wananchi." amesema Abdul Mzee.