Ofisi ya Mkuu wa Mkoa wa Mwanza yamfariji Naibu Waziri Mary Masanja

Posted on: July 11th, 2022

Mkuu wa Mkoa wa Mwanza Mhe Mhandisi Robert Gabriel ametoa rai kwa familia ya Mzee Masanja kuwa na subira na kumtumaini Mungu kama mfariji Mkuu kufuatia Kifo cha mzee Charles Masanja kilichotokea Julai 06, 2022 katika Hospitali ya Bugando kutokana na matatizo ya Moyo na kuzikwa katika kijiji cha Badugu-Busega Mkoani Simiyu tar 09, 2022.

Kwa majonzi makubwa Mhe Mkuu wa Mkoa ametoa ubani huo mapema leo nyumbani kwa Mzee Charles Masanja katika mtaa wa Kilimahewa Mjini Mwanza alipofika nyumbani hapo kutoa pole kwa Naibu Waziri wa Maliasili na Utalii Mhe. Mary Masanja ambaye ni mwanafamilia, ndugu na jamaa.

"Poleni sana kwa msiba huu mzito, Mungu awape nguvu na faraja, niwasihi ninyi kama familia wenyewe muwe sehemu ya matumaini kupitia vikao vyenu na tumshukuru Mungu siku zote kwa uhai wa wazee hawa na muendelee kupendana." Mkuu wa Mkoa.

Naye, Mhe Mary Masanja, amemshukuru Mkuu wa Mkoa na viongozi wote Mkoani humo kwa Ushirikiano katika kipindi cha uhai wa mzee Masanja na hata wakati wa majonzi yalipowapata na amemtakia kheri katika kuuongoza Mkoa huo wenye vivutio lukuki vya utalii.

Aidha, Mhe Masanja ametoa pole kwa Mkoa kufuatia kuunguliwa Moto kwa Bweni la wanafunzi kwenye shule ya Sekondari ya wavulana Bwiru uliotokea mwishoni mwa mwezi Juni 2022 na amemtia moyo Mkuu wa Mkoa kuwa na ujasiri kupitia tatizo hilo huku akibainisha kuwa ofisi yake ipo pamoja nao.