PAMBA JIJI WAZINDUA UUZAJI WA TIKETI, RC MTANDA ASEMA PAMBA DAY KUWA YA AINA YAKE AGOSTI 10

Posted on: July 22nd, 2024

PAMBA JIJI WAZINDUA UUZAJI WA TIKETI, RC MTANDA ASEMA PAMBA DAY KUWA YA AINA YAKE AGOSTI 10

Mkuu wa Mkoa wa Mwanza Mhe. Said Mtanda amewataka mashabiki na wapenzi wa Timu ya Pamba Jiji FC kununua tiketi za kuingilia kwenye Tamasha la Pamba Day itakayofanyika Agosti 10 mwaka huu ili kuwahi nafasi kabla hazijajaa.

Mtanda ametoa wito huo leo Julai 22, 2022 wakati wa mkutano wa wadau wa maendeleo ya mpira wa miguu uliofanyika kwenye uwanja mkongwe wa Nyamagana ulioenda sambamba na uzinduzi wa uuzwaji wa tiketi za kuingia kwenye tamasha hilo.

Amesema ni wakati sasa kwa watu wote wenye maoni ya kuboresha timu hiyo kwenda kwenye uongozi wa timu hiyo kufanya hivyo na siyo matamanio ya watu wachache kwa timu za nje ya mkoa huo kusababisha siku za mechi kwenye msimu ujao wakajitokeza watu kuwapokea wageni.

"Tumedhamiria kurejesha furaha za wanapamba kwa mashabiki wa ndani na nje ya nchi ambayo wameikosa kwa zaidi ya miaka 23, tunawashukuru sana wachezaji wetu wa zamani waliopo na waliotangulia mbele za haki". Mhe. Mtanda.

Aidha, amewataka mashabiki wa timu ya Pamba Jiji kuipa ushirikiano wa kutosha timu yao kwani imekamilika kutokana na usajili mzuri uliofanywa kwenye mchujo wa zaidi ya wachezaji 900 na akabainisha kuwa pamoja na usajili wa wachezaji kutoka nje wapo wachezaji wazawa kwenye kikosi hicho maarufu kama wana Kawekamo TP Lindanda.

Tamasha la siku ya Pamba linatarajiwa kufanyika Agosti 10, 2024 kwenye uwanja wa CCM Kirumba na wasanii mbalimbali watokanao na Mkoa wa Mwanza watatumbuiza wakiongozwa na Farid Kubanda maarufu kama Fid Q pamoja na wakubwa wa nje ya Mkoa wakiongozwa na Harmonize (Konde boy).