RAIS SAMIA AWASILI RASMI MWANZA,ASHUKURU KWA MAPOKEZI MAKUBWA

Posted on: October 12th, 2024

Rais wa Jamhuri ya Muungano wa Tanzania Mhe.Dkt.Samia Suluhu Hassan amewasili rasmi leo mkoani Mwanza kwa ajili ya maadhimisho ya kilele cha mbio za Mwenge wa Uhuru na kuwashukuru wakazi wa Mkoa huo kwa mapokezi makubwa walioonesha kwake.

Rais Samia ambaye ni mgeni rasmi wa kilele hicho kitakachofanyika Oktoba 14,2024 kwenye uwanja wa CCM Kirumba,akiwa njiani mara baada ya kuwasili alisimama eneo la Pasiansi wilayani Ilemela na kuzungumza na wananchi waliofurika kumlaki na kuridhishwa na maandalizi yote ya kuelekea katika kilele hicho.

"Nimeona wiki ya vijana Kitaifa ilivyo fana,na leo asubuhi mmefanya mbio za hisani za kumbukizi ya Baba wa Taifa ambazo zimepata mwamko mkubwa,hakika mmeyatendea haki maadhimisho haya," Rais Samia

Akimkaribisha Rais Samia kuzungumza na wananchi,Mkuu wa Mkoa wa Mwanza Mhe.Said Mtanda amesema Mkoa upo kwenye hali nzuri ya usalama na amani na wananchi wamehamasika vya kutosha na kilele cha Mwenge wa Uhuru.