RAIS SAMIA KUFANYA ZIARA YA SIKU MOJA MWANZA

Posted on: January 28th, 2024

RAIS SAMIA KUFANYA ZIARA YA SIKU MOJA MWANZA

*RC Makalla awakaribisha wananchi kumlaki Uwanja wa Ndege*

*Mhe. Rais atazungumza na wananchi Nyamagana Stadium*

Rais wa Jamhuri wa Muungano wa Tanzania Mhe. Samia Suluhu Hassan anatarajia kufanya ziara ya kikazi ya siku moja Mkoani Mwanza siku ya jumanne ya tarehe 30 Januari, 2024.

Hayo yamebainishwa na Mkuu wa Mkoa wa Mwanza Mhe. CPA Amos Makalla mapema leo tarehe 28 Januari, 2024 wakati wa Mkutano wake na Waandishi wa Habari uliofanyika ofisini kwake.

Makalla amesema Rais Samia atawasili kwenye uwanja wa ndege siku ya jumanne saa 2 asubuhi na atakabidhi zana za Uvuvi kwa wavuvi wa Kanda ya ziwa kabla ya kuzungumza na wananchi kwenye mkutano wa hadhara.

CPA Makalla ametumia wasaa huo kuwakaribisha wananchi wa Mwanza na mikoa ya jirani ya Kanda ya ziwa kumlaki Kiongozi huyo na kufika kwenye viwanja vya Nyamagana kuanzia saa 12 asubuhi ili kumsikiliza.

Amesema, Mkoa wa Mwanza ni mnufaika mkubwa wa zana hizo za uvuvi pamoja na miradi mbalimbali ya kimkakati inayotekelezwa katika sekta mbalimbali kama Uchukuzi, Ujenzi, Elimu, Afya, Biashara, Afya na Maji.

Aidha, amefafanua kuwa wananchi watatumia milango ya upande wa Stesheni ya Reli kuingia kwenye viwanja hivyo na kwamba viongozi wakuu wa Mikoa yote ya kanda ya ziwa watakuwepo kwenye Mkutano huo.