RC MAKALLA AAGIZA KUPATIKANA KWA SULUHU KWENYE USHURU WA VIBANDA STENDI KWIMBA

Posted on: June 27th, 2023

RC MAKALLA AAGIZA KUPATIKANA KWA SULUHU KWENYE USHURU WA VIBANDA STENDI KWIMBA

*Amtaka Mkuu wa Wilaya na Uongozi wa Halmashauri kulitatua suala la ushuru wa vibanda kwa mazungumzo*

*Ahimiza mkazo wa elimu kwa Jamii kuhusu utoro wa wanafunzi shuleni*

*Ataka kutolewa kwa Elimu kuhisu athari za Utoro shuleni*

Mkuu wa Mkoa wa Mwanza Mhe. CPA. Amos Makala amemtaka Mkuu wa Wilaya ya Kwimba na uongozi wa Halmashauri ya Kwimba kutafuta suluhu katika Ukusanyaji wa ushuru kwa wafanyabiashara waliojenga vibanda katika stendi ya Ngudu na Malya.

Mhe. CPA. Makalla amesema hayo leo Juni 26, 2023 kwenye Mkutano wa Baraza la Madiwani wa Halmashauri ya Wilaya ya Kwimba kwa ajili ya kujadili hoja za Mdhibiti na Mkaguzi Mkuu wa Hesabu za Serikali (CAG) za Mwaka 2021/22.

"Niwaombe mkae nao muwaeleze kwamba eneo lile ni la serikali na  wanachotakiwa kufanya na mkuu wa wilaya uongoze kikao hicho, muwabaini wachochezi wa mgogoro ambao hawahusiki na eneo hilo mkae katika majadiliano na watu wanaohusika na vile vibanda, mpate orodha ya watu waliokubali kusaini mikataba na kulipa na mpare orodha ya watu waliogoma kulipa," RC Makalla.

Aidha Mkuu huyo wa Mkoa amewataka viongozi wa Halmashauri hiyo kuhakikisha wanasimamia na kutoa elimu kwa wazazi na jamii kwa ujumla juu ya umuhimu wa elimu kwa watoto ili kutokomeza suala la utoro na kukuza ufaulu shuleni.

"Swala la utoro shuleni, ufaulu na watu kutokumaliza shule niwaombe sana watendaji wetu tutoe elimu hiyo ya umuhimu wa watoto wetu kusoma na kuhakikisha ni ajenda yetu sote na sio afisa elimu tu na jamii nzima ielewe umuhimu wa kuwapeleka watoto shule kwa kuwa Serikali ya awamu ya sita imeboresha mazingira ya elimu hakuna sababu ya watoto kutokwenda shule,"CPA Makalla.

Vilevile, Mhe. Makalla ameipongeza Halmashauri ya Wilaya ya Kwimba kwa kupata Hati Safi kutoka kwa Mdhibiti na  Mkaguzi Mkuu wa Hesabu za Serikali (CAG) na amewataka Madiwani kufanyia kazi na kuijadili taarifa ya mkaguzi mara kwa mara.

Naye, Mkuu wa Wilaya ya Kwimba Mhe. Ng'wizalubu Ludigija amemuahidi Mkuu wa Mkoa kwa niaba ya watumishi, kamati ya usalama na Kwimba kwa ujumla kwamba watasimamia maelekezo yote aliyo wapa.

Halikadharika, Kaimu Mkaguzi Mkuu wa Nje wa Mkoa wa Mwanza Waziri Shabani kwa niaba ya Mdhibiti na Mkaguzi Mkuu wa Hesabu za Serikali (CAG) amesema Halmashauri ya Wilaya ya Kwimba imepata hati safi inayoridhisha kutokana na ushirikiano alioupata kwa watumishi wa Halmashauri hiyo.