RC Malima akabidhiwa Hati ya Makabidhiano na aliyekuwa Mkuu wa Mkoa wa Mwanza Mhandisi Robert Gabriel

Posted on: August 4th, 2022

Mkuu wa Mkoa wa Mwanza, Mhe. Adam Malima  Agosti 03, 2022 amekabidhiwa Hati za Makabidhiano na aliyekua Mkuu wa Mkoa huo Mhe. Robert Gabriel kama ishara ya kukabidhiwa Rasmi Ofisi ya Mkuu wa Mkoa kwa ajili ya kuanza Rasmi majukumu kwenye Mkoa huo.

Akizungumza na Viongozi kutoka Taasisi mbalimbali amemshukuru aliyekua Mkuu wa Mkoa wa Mwanza Mhe. Robert Gabriel kwa ushirikiano aliouonesha kwake kwa kipindi kirefu katika maeneo mbalimbali ambayo amekutana naye na kwa upendo wake kwa wananchi wa Mwanza aliokua akiwaongoza.

Mhe. Malima ametaja Ulinzi na Usalama Imara kuwa ni kipaumbele chake, uchumi na ustawi wa jamii katika maendeleo ya sekta za Elimu na Afya vikienda sambamba na uimarishaji wa Ukusanyaji wa Mapato ya ndani na kwamba vitakua vipimo vya maendeleo ndani ya Mkoa huo.

"Ndugu viongozi na watumishi tukitoka hapa leo tunaanza kufanya tathmini ya Maendeleo na Ustawi wa wananchi wa Mkoa wa Mwanza, Mwanza ni kubwa sana kiuchumi na hata kijamii hivyo inastahili mazuri zaidi ya ilivyo sasa kwahiyo naomba tukajipime katika hilo." Amesema Mhe. Malima.

Katibu Tawala Mkoa wa Mwanza, Elikana Balandya amemshukuru Rais Samia Suluhu Hassan kwa kumteua na amebainisha kuwa yupo tayari kushirikiana kwa dhati na viongozi na watumishi wote katika kuuletea maendeleo Mkoa wa Mwanza.

Akitoa neno la shukrani, aliyekua Katibu Tawala wa Mkoa wa Mwanza, Ndugu Ngusa Samike ambaye ni Katibu Tawala wa Mkoa wa Lindi amemshukuru Rais Samia Suluhu Hassan kwa kuendelea kumuamini na kumbadirisha kituo na amemhaidi kwenda kuchapa kazi kwa dhati.

Aidha, amemshukuru Mhe. Robert Gabriel kwa ushirikiano na miongozo mbalimbali na amewashukuru Viongozi wa Dini, Chama Cha Mapinduzi, Serikali na watumishi wote kwa kuuletea sifa na heshma Mkoa wa Mwanza kwa pamoja wakati wote waliohudumia wananchi kwa pamoja.

Naye, Mkuu wa Mkoa Mstaafu Mhe. Mhandisi Robert Gabriel amemshukuru kwa dhati Rais Samia Suluhu Hassan kwa kumuamini na kumpa nafasi ya kuwahudumia wananchi wa Mwanza na amewashukuru viongozi wa dini na amewasihi kuendelea kumuombea Mhe. Rais na Taifa ili liweze kupiga hatua kimaendeleo.

Vilevile, Mhe Gabriel ametoa rai kwa Viongozi na Watumishi wa Umma kumuomba Mungu wakati wote, kupenda Taifa lao na kumpenda Rais na kumuombea mema ili kupata mafanikio na kuweza kusaidia wananchi walio wengi.