Mkuu wa Mkoa wa Mwanza, Mhe. Adam Malima amewataka wazalishaji na wafanyabiashara mkoani humo kuzingatia misingi ya Ushindani kwa mujibu wa taratibu za nchi ili kulinda mustakabali wa ukuaji wa uchumi wa nchi.
Mhe. Malima ameyasema hayo wakati akifungua Semina ya uhamasishaji wa masuala ya ushindani na udhibiti wa bidhaa bandia kwa wazalishaji iliyofanyika katika ukumbi wa Halmashauri ya Jiji la Mwanza leo, Agosti 18, 2022.
"Ushindani una misingi ya kufuata, watanzania tuna mgogoro wa viwango na ushindani tena wa ndani na wa nje lakini lazima tuzingatie ubora wa bidhaa zetu na kusema tu bidhaa ni bidhaa na tukifanya hivyo tutasaidia kukuza uchumi wa nchi yetu."
Aidha, ameishukuru Tume ya Ushindani kwa mafunzo hayo murua ambayo yatawasaidia wafanyabiashara kufahamu masuala ya udhibiti wa bidhaa bandia na kuwapitisha kwenye sheria na wajibu wa Mtumiaji wa bidhaa na huduma wanazojihusisha nazo.
Vilevile, ametoa wito kwa Tume ya Ushindani nchini kuangalia ubora wa bidhaa nchini kwa kulinganisha na hali ya bei kwenye bidhaa hasa za viwandani na ujenzi ambako ni sekta nyeti kwa maendeleo ya makaazi ya wananchi na ameahidi kushirikiana nao kwenye eneo hilo.
Naye William Erio, Mkurugenzi Mkuu wa Tume ya Ushindani (FCC) amesema katika kutekeleza malengo ya serikali ya kuvutia wawekezaji na kuimarisha uwekezaji nchini Taasisi hiyo imeweka kanuni na taratibu za kuhakikisha bidhaa zinazotumika nchini zinakua bora na si bandia na kwamba mlaji na mfanyabiashara haumii kwa namna yoyote.
"Shughuli zenu haziishii kwenye kuzalisha pekee bali bali uingizaji wa biashara hapa nchini sasa sisi tunasimamia ubora wa bidhaa na kuhakikisha wafanyabiashara hawajihusishi na bidhaa bandia hivyo ni lazima mfuate kanuni na taratibu kuhakikisha mnasajiri biashara zenu" amesema bwana Erio.
Ofisi ya Mkuu wa Mkoa, Mkoa wa Mwanza, 2 Regional Drive
S.L.P: 119, Mwanza.
Simu: 028-2501037
Simu ya Mkononi: 028-2501037
Barua Pepe: ras@mwanza.go.tz
