RC MTANDA AKABIDHI GARI JIPYA KWA WANACHAMA CWT SENGEREMA

Posted on: July 15th, 2024

RC MTANDA AKABIDHI GARI JIPYA KWA WANACHAMA CWT SENGEREMA

Mkuu wa Mkoa wa Mwanza Mhe. Said Mtanda leo  15 Julai 15, 2024 amekabidhi gari jipya aina ya TATA lililogharimu Shilingi Milioni 145 kwa ajili ya kutoa huduma kwa wanachama wa Chama cha Walimu (CWT) Wilaya ya Sengerema.

Akizungumza kwenye hafla ya makabidhiano hayo iliyofanyika kwenye viwanja vya Halmashauri ya Jiji la Mwanza  Mhe. Mtanda amewataka CWT kuhakikisha wanaajiri dereva muadilifu na mwenye weledi ambaye atalitunza gari hilo kwa muda mrefu.

"Gari hili ni la gharama kubwa sana  hivyo lazima mlitunze, msiajiri dereva mlevi mwisho wake akaligongesha na akawasababishia hasara". Amesisitiza Mkuu wa Mkoa.

Amesema, gari hilo ni lazima litumike kwa malengo yaliyokusudiwa ikiwemo kuimarisha mahusiano baina ya walimu kutoka wilaya moja na nyingine kupitia kutembeleana kwa shughuli za kitaaluma pamoja na michezo mbalimbali.

Awali, Mwenyekiti wa CWT Mkoa wa Mwanza Mwalimu Lameck Mahewa alibanisha kuwa fedha zilizonunua basi hilo ( Milioni 145) zimetokana na michango ya wanachama wenyewe.

"Tunashukuru sana kupata gari hii, nina imani pia litatumika kuwapeleka uwanjani walimu mashabiki wa timu ya pamba pale Pamba Jiji itakapokuwa ina chuana hapa Mwanza". Mwalimu Mahewa.

Gari hilo linatazamiwa kuwa na umuhimu mkubwa kwa chama cha walimu Wilaya ya Sengerema katika kufuatilia maslahi na madai mbalimbali ya walimu ndani ya wilaya ya Sengerema, Mkoa wa Mwanza na hata ngazi ya Taifa.