RC MTANDA AKABIDHIWA OFISI RASMI, AAHIDI UTUMISHI WA USHIRIKIANO

Posted on: April 6th, 2024

RC MTANDA AKABIDHIWA OFISI RASMI, AAHIDI UTUMISHI WA USHIRIKIANO

Kufuatia Mabadiliko aliyoyafanya Rais Samia siku za karibuni, leo Aprili 06, 2024 Mkuu wa Mkoa wa Mwanza Mhe. Said Mohamed Mtanda amekabidhiwa rasmi Ofisi na aliyekua Mkuu wa Mkoa huo Mhe. Amos Makalla baada ya kuhamishiwa kutoka Mkoa wa Mara.

Akiongea na hadhara baada ya makabidhiano hayo Mhe. Mtanda amesema katika uongozi wake ataendeleza yale yote yaliyoasisiwa na mtangulizi wake na kwamba anaamini kwenye ushirikiano hivyo anautegemea kwa viongozi wote naye atashirikiana nao kwa dhati.

Naye, aliyekua Mkuu wa Mkoa wa Mwanza  Mhe. CPA Amos Makalla amemshukuru Rais Samia kwa kuendelea kumuamini na baada ya kumtoa kwenye Mkoa wa Mwanza amemteua kwenda kuhudumu kwenye nafasi ya Katibu wa Halmashauri kuu ya CCM Itikadi, Uenezi na Mafunzo.

Aidha, ameipongeza Serikali kwa miradi lukuki ya kimkakati hususani Reli ya SGR, Daraja la Kigongo-Busisi, Ukarabati wa Meli ya mizigo pamoja na ujenzi wa Meli ya kisasa ya MV Mwanza pamoja na uboreshaji wa uwanja wa ndege kuwa wa Kimataifa kwamba ukamilifu wa miradi hiyo utaifungua zaidi Mwanza kiuchumi.

Aidha, amewashukuru watumishi na viongozi wote alioshirikiana nao katika kuwaletea maendeleo wananchi hususani amewasifu kwa kutembea naye sambamba vijijini ambako muda mrefu alifika kwa ajili ya kuwasikiliza wananchi katika kuwasikiliza na kutatua migogoro inayowakabili.

Hafla hiyo fupi imehudhuriwa na Kamati ya Usalama Mkoa, Wakuu wa Wilaya, Wakurugenzi na Makatibu Tawala, Kamati ya amani, Shirikisho la vyama la wenye ulemavu, viongozi wa vyama vya siasa, wazee wa Mkoa wa Mwanza, Watemi na Machifu, Kamati Tendaji ya Pamba Jiji FC, Chuo cha SAUT, Watumishi wa RS pamoja na Wafanyabiashara.