RC MTANDA ATAKA ELIMU ZAIDI YA JAMII KUBORESHA MALEZI

Posted on: May 16th, 2024

RC MTANDA ATAKA ELIMU ZAIDI YA JAMII KUBORESHA MALEZI

Mkuu wa Mkoa wa Mwanza Mhe. Said Mtanda amewataka watendaji wa Serikali kupitia idara zinazosimamia maendeleo ya jamii kushirikiana na sekta binafsi kutoa elimu kwa jamii ya namna bora ya kuboresha malezi.

Akiwa kwenye Maadhimisho ya siku ya Familia Duniani yaliyofanyika kwenye uwanja wa Getrude Mongela Mei 15, 2024 Mtanda amesema Serikali kwa kushirikiana na marafiki wa maendeleo itaendelea kutoa elimu ya namna ya malezi bora kwenye familia

Amebainisha kuwa tafiti zinaonesha uwepo wa migogoro mingi kwenye jamii hivyo ni wakati sasa wa kuona namna ya kuondoa hali hiyo kwa kushirikiana baina ya familia, Serikali na wadau wa maendeleo ili kuhakikisha kunakua na ustawi wa familia.

"Bado kuna migogoro kwenye familia na ukatili kwa watoto licha ya kuwepo na madawati ya kushughulika changamoto hizo, ni wajibu wetu kuendelea kupeana elimu ili tuwe na Jamii iliyostaarabika na yenye upendo," amehimiza Mkuu huyo wa Mkoa.