RC MTANDA ATOA SAA 24 KWA KAMISHNA WA ARDHI KUTOA HATI YA KIWANJA KWA MTEJA ALIYEZUNGUSHWA ZAIDI YA MIAKA MITANO

Posted on: July 11th, 2024

RC MTANDA ATOA SAA 24 KWA KAMISHNA WA ARDHI KUTOA HATI YA KIWANJA  KWA MTEJA ALIYEZUNGUSHWA ZAIDI YA MIAKA MITANO

Mkuu wa Mkoa wa Mwanza Mhe. Said Mtanda amemtaka Kamishna Msaidizi wa Ardhi Mkoani humo kuhakikisha anampatia Hati ya Kiwanja kilichopo Nyasaka Jijini Mwanza Mwananchi aitwaye Ezekia Nyakonge Bugingo ndani ya saa 24 kwani amehangaika kwa muda mrefu bila mafanikio.

Mhe. Mtanda ametoa agizo hilo mapema leo  Julai 11, 2024 kwa njia ya simu aliyompigia moja kwa moja mtendaji huyo akiwa kwenye Ofisi za Idara ya ardhi wilayani Ilemela na kubaini kuwa mwananchi huyo amekua akifuatilia hati hiyo kuanzia mwaka 2018 bila mafanikio.

Mhe. Mtanda baada ya kuzuru ghafla kwenye Ofisi hizo na kuketi kuanza kuwasikiliza wateja waliokua wamejaa amesema hataki uzembe kazini na akaahidi kuwaondoa wote wanaojihusisha na rushwa kwenye ofisi hizo kwani wanachelewesha haki kwa wananchi.

"Kwanini mnapenda kusumbua watu, hapa kuna ubabaishaji haiwezekani mtu anakuja hapa miaka 5 anazungushwa hapati haki yake hivyo mnakaribisha rushwa maana kama hakuna rushwa kusingekua na uzungushaji wa wateja ambao wangehudumiwa ndani ya dakika tano." RC Mtanda..

Pamoja na mteja huyo, Mhe. Mtanda amebaini tabia ya ucheleweshaji wa huduma kwa wananchi kuwa ni sugu kwa idara ya ardhi kwenye ofisi hizo na akasema wasipobadilika atahakikisha anawachukulia hatua za kinidhamu ikiwemo na kuwaondoa kwenye ofisi hizo.