TAG MWANZA HAIMTAMBUI MTUHUMIWA WA MAUAJI ERNEST MASANJA

Posted on: July 22nd, 2024

TAG MWANZA HAIMTAMBUI MTUHUMIWA WA MAUAJI ERNEST MASANJA

Askofu wa Kanisa la Tanzania Asembles of God (TAG) Jimbo la Mwanza Kusini Mhe. Isack Gwalalika amesema kanisa hilo halihusiki na tuhuma za mauaji zinazomhusu John Ernest Masanja anayetuhumiwa kumuua Majuto Mabula Seif na kisha kujitambulisha kama Mchungaji wa Kanisa hilo

Ametoa tamko hilo mapema leo Julai 22, 2024 kwenye kanisa na TAG lililopo maeneo ya Nyegezi Kona wakati akizungumza na waandishi wa Habari kwenye mkutano maalumu ulioandaliwa na kanisa hilo mahususi kwa ajili ya kutoa tamko hilo.

Askofu Gwalalika amesema kanisa hilo limeona taarifa zilizotolewa na Jeshi la Polisi mapema (Julai 5, 2024) kuwa mtuhumiwa huyo amejitambulisha kuwa ni mchungaji wa kanisa la TAG ikiwa siyo sahihi hivyo wametumia wasaa huo kumtaka mtuhumiwa kutojitambulisha hivyo tena kwakua kanisa hilo halimtambui.

Aidha, ametoa wito kwa Jeshi la Polisi kuwa watuhumiwa wengine hutoa taarifa za uongo hivyo kabla ya kuzitangaza kwa umma wanatakiwa wajiridhishe kwani kutofanya hivyo kunapelekea mkanganyiko kama huo ambao umesababisha taharuki kwenye kanisa hilo.

Ameongeza kuwa kanisa hilo (TAG) lenye washirika 193,741 nchini huku likiwa na majimbo matatu Mkoani Mwanza huku likiwa na makanisa 131 na washirika zaidi ya elfu 13 linatambua weledi wa jeshi la polisi na wataendelea kushirikiana nao katika kujenga Taifa.