Waziri wa Maji Aweso awapa Rai Viongozi wa Mwanza

Posted on: July 22nd, 2022

Mhe. Jumaa Aweso (MB) Waziri wa Maji leo Julai 22, 2022 ametoa Shime kwa watumishi Mkoani Mwanza kushikamana kwa pamoja ili kuuletea maendeleo Mkoa huo na kukataa kuwapa kazi wakandarasi wasiofaa Miradi ya Maji.

Mhe Aweso ametoa wito huo akiwa ziarani Mkoani humo kukagua Miradi wa Maji wakati akiwasalimia Viongozi kwenye Ukumbi wa Ofisi ya Mkuu wa Mkoa waliokutana na Wadau wa Elimu kuweka Mikakati ya kufanikisha Kampeni Kubwa ya Ujenzi wa Miundombinu wa Vyumba vya Madarasa kwa shule za Msingi na Sekondari inayotarajiwa kuanza mapema wiki ijayo.

"WanaMwanza ngoja niwape sifa ya Mhe. Mkuu wa Mkoa huyu, anapenda Maendeleo na kama wanamwanza mnataka Maendeleo basi ni lazima mkubali kushikamana kwa pamoja Wabunge, Wakuu wa Wilaya, Wenyeviti wa Halmashauri na Watumishi wote kwa ujumla kwani gari likikwama kwenye matope mnashirikiana kulisukuma kwa pamoja na mnachafuka wote katika kuliondoa."

Kuhusu Wakandarasi kwenye Miradi ya Maji, Aweso amesema, "Wakandarasi wasiofanya kazi vizuri kwa historia yao na wale wenye maneno mengi na vitendo vichache msiwape kazi kwani ili watu wapate huduma ya maji Safi na Salama ni lazima tuwe na wakandarasi wazuri kwenye miradi yetu."

Katika wakati mwingine, Mhe Aweso ametoa Mifuko 200 ya Saruji kwa ajili ya kuunga mkono Kampeni kubwa ya Mkoa wa Mwanza ya Ujenzi wa Miundombinu ya Vyumba vya Madarasa katika kuhakikisha wanafunzi kwenye shule za Msingi na Sekondari wana soma kwenye madarasa bila kusongamana.