Butimba Yakabidhiwa zawadi ya ushindi

Shule ya Msingi Butimba  ‘B’ imeibuka mshindi wa kwanza  katika mtihani maalum uliotungwa na Afisa Elimu Mkoa wa Mwanza kwa kushirikiana na  maafisa elimu wa Jiji la Mwanza na Halmashauri ya Manispaa ya Ilemela ambapo imekabidhiwa zawadi.

Mtihani huo ulifanyika wiki iliyopita kwa kushirikisha shule nne bora  kutoka Jiji la Mwanza na Manispaa ya Ilemela ambazo ni Butimba A na B, Bwiru na Gedeli ambapo  matokeo yametangazwa  na Afisa Elimu Mkoa, Michael Ligola ambapo alisema  lengo ni kutaka kuona shule za  kutoka Mwanza zinaingia katika orodha ya shule 10 bora kitaifa katika matokeo ya mtihani wa darasa la saba unaotarajiwa kuanyika Septemba 11 na 12, mwaka huu.

Ligola amesema  wanafunzi wa Shule ya  Msingi Butimba ‘B’ wamefaulu kwa zaidi ya asilimia 100  katika masomo yote, mshindi wa pili ni Butimba A, mshindi wa tatu ni Bwiru na Gedeli imekuwa ya mwisho  ambapo amebainisha somo ambalo limeonekana kutokuwa na matokeo mazuri ni Kiswahili.

Ligola alisema kutokana na matokeo hayo yamempa imani shule za Mwanza zitaingia katika orodha ya shule 10 bora kitaifa katika mtihani unaotarajiwa kufanyika huku  akitangaza  kwamba kuanzia sasa wanafunzi wataweka kambi mashuleni kwa lengo la kuhakikisha kasoro zilizojitokeza zinaondolewa.

Akikabidhi zawadi kwa mshindi wa kwanza hadi wanne, Katibu Tawala wa Mkoa wa Mwanza, Christopher Kadio, amesema hakuna sababu inayozuia shule za Mwanza kuingia katika orodha ya shule 10 kitaifa kwa kuwa kila rasilimali zipo, hivyo aliwataka wanafunzi kuongeza juhudi na  siyo kubweteka na matokeo hayo.

“Mwanza tunatakiwa kufanya vizuri  katika mtihani kwa sababu kila rasilimali zipo na nimedokezwa kwamba mtihani mliofanya umetungwa kwa mfumo wa mtihani wa taifa ambao mnatarajia kuufanya Septemba 11 na 12 mwaka huu, hivyo naomba muongeze bidii zaidi kwa siku zilizobaki.

“Hapa mshindi wa kwanza  tutamkabidhi mbuzi mmoja tena beberu na fedha taslimu ambazo mtatumia katika kufanikisha mahafali yenu baada ya mtihani wa taifa, mshindi wa pili, wa tatu na wanne tutawapa fedha taslimu  lakini kikubwa nawaomba muongeze jitihada, tunataka shule 10 bora na Mwanza iwemo,”alisema.

Hata hivyo  Kadio alitoa Sh. 20,000 kwa   kila mwanafunzi, kwa wale 10 waliofanya vizuri katika mtihani huo.Pia aliwaahidi walimu wakuu wa Shule za Butimba, Bwiru na Gedeli  kwamba changamoto zilizopo katika shule hizo zitafanyiwa kazi haraka ili kusiwepo na kisingizio tena.

Naye Mwalimu Mkuu wa Shule ya Butimba, Dotto Emmanuel alisema shule hiyo kufanya vizuri ni desturi yao na kuahidi kwamba atawashangaza watu  kuingia 10 bora kitaifa ingawa haijawahi kutokea.Hafla hiyo imehudhuriwa na maafisa elimu jiji la Mwanza,  Manispaa ya Ilemela baadhi ya walimu na wanafunzi.

Hivi  karibuni Serikali mkoani Mwanza iliweka  maazimio 14 kwa walimu wakuu, maafisa  elimu wa kata na taaluma ili kuinua ufaulu kwa shule za msingi 2019/2020 ambapo mitihani hiyo ni sehemu ya utekelezaji  kwa vitendo kwa wanafunzi wa darasa la saba wanaotarajia kufanya mtihani wa taifa kati ya Septemba 11-12, mwaka huu.