MAAFISA ELIMU KATA WATAKIWA KUTUMIA TEHAMA KULETA TIJA KITEKNOLOJIA

MAAFISA ELIMU KATA WATAKIWA KUTUMIA TEHAMA KULETA TIJA KITEKNOLOJIA

Maafisa Elimu Kata, Waalimu wa shule za Awali, Msingi na Wakuu wa Shule za Sekondari wametakiwa kutumia elimu ya TEHAMA ili kuleta tija katika kipindi hiki cha maendeleo ya Sayansi na Teknolojia.

Rai hiyo imetolewa leo tarehe 24 Februari, 2024 na Mkurugenzi Msaidizi wa Elimu ya awali na msingi kutoka Ofisi ya Rais TAMISEMI Mwalimu Suzan Nyalubamba wakati wa ufungaji wa mafunzo kwa watumishi wa Kanda ya Ziwa yaliyofanyika jijini Mwanza.

Nyalubamba amewataka kuhakikisha vifaa vya TEHAMA vinatunzwa ipasavyo na vinatumiwa kwa malengo yaliyo kusudiwa kwani lengo kuu ni kuongeza ubunifu kwa wanafunzi na waalimu ili kuendana na kasi ya Dunia ya sasa.

Ameongeza kuwa kupitia miradi miwili inayofadhiliwa na mkopo wa Benki ya Dunia yaani Sequip kwa Shule za Sekondari na BOOST Shule za Msingi imesaidia kuongeza miundombinu ya  shule ikiwemo madarasa na matundu ya vyoo.

Amebainisha kuwa kwa mwaka wa fedha unaoendelea Serikali inajenga shule 212 za Sekondari na Shule 6 za Kitaifa za Wasichana mpya kabisa na kupitia BOOST

wamenga shule 320 ili kupunguza msongamano wa wanafunzi na kutembea umbali mrefu kufika shuleni.

Mmoja wa washiriki wa mafunzo hayo, Mwalimu Esther Simba ambaye ni Afisa elimu kata ya Sola amesema kupitia elimu waliyoipata wanakwenda kuongeza kiwango cha ufaulu kwa wanafunzi na ufanisi makazini kwa kuwajengea uwezo waalimu wengine.