RC MTANDA AONGOZA MAPOKEZI YA WAZIRI WA FEDHA JIJINI MWANZA

RC MTANDA AONGOZA MAPOKEZI YA WAZIRI WA FEDHA JIJINI MWANZA

Mkuu wa Mkoa wa Mwanza Mhe. Said Mtanda amewaogoza Wakuu wa Idara, Sehemu na Vitengo kutoka Ofisi ya Mkuu wa Mkoa katika mapokezi ya Waziri wa Fedha Mhe. Dkt. Mwigulu Nchemba aliyewasili Jijini Mwanza kwa ziara ya kikazi.

Akizungumza mara baada ya kumpokea Waziri huyo Mhe. Mtanda ameshukuru Mhe. Rais kupitia Wizara hiyo kwakuwa amekuwa akiidhinisha fedha nyingi za miradi mbalimbali inayotekelezwa Mkoani humo ikiwemo ile ya kimkakati kupitia Wizara ya Fedha.

"Ofisi yangu imekuwa ikipokea fedha nyingi sana, kipekee ninamshukuru sana Mhe. Rais ameendelea kutuletea fedha nyingi za miradi kupitia wizara yako, na sisi tunakuahidi Mhe. Waziri tutaendelea kuzisimamia fedha hizi ili zikatumike kama ilivyokusudiwa kwa lengo la kuwaletea wananchi wa Mwanza maendeleo". Amesema RC Mtanda.

Naye Waziri wa Fedha Mhe. Dkt. Mwigulu Nchemba amesema ujio wake katika Mkoa wa Mwanza ni kuja kukagua, kuzindua na kutembelea miradi mbalimbali ambayo Serikali imekuwa ikiitekeleza katika Mkoa wa Mwanza na kuzungumza pia na wananchi kuwaleza namna serikali inavyoeendelea kuratibu na kutekeleza miradi hiyo.

Mhe. Dkt. Mwigulu amesema Mhe. Rais Dkt. Samia amekuwa akitoa fedha nyingi za miradi na ameendelea kukuhakikisha anatimiza ahadi yake ya kuwaletea maendelea wananchi wa Tanzania hivyo amedhamiria kutembelea na kukagua miradi yote kuanzia ngazi za juu mpaka za vitongoji ili kujionea ufanisi wa utekelezaji wa miradi hiyo.

"Nimeambatana pia na Wataalamu wangu kutoka Wizarani lakini pia kutoka maeneo mbalimbali ya kisekta ili kuhakikisha katika ziara hii pia tunatatua na kutoa elimu kuhusu masuala mbalimbali yakiwemo yale ya kimfumo kama vile NeST". Amesema Waziri wa Fedha.

Mhe. Dkt. Mwigulu aliwasili Mkoani Mwanza ijumaa ya tarehe 13 Septemba 2024 ambapo alianza ziara yake rasmi Wilayani Misungwi kwa kutembelea mradi wa ujenzi wa Chuo cha Uhasibu Tanzania (TIA) Kampasi ya Mwanza na kisha kuzungumza na Wananchi wa Misugwi Mjini na leo ameendelea na ziara yake Wilayani Nyamagana ambapo atakagua maendeleo ya mradi wa ujenzi wa Soko Kuu la Mjini Kati Jijini Mwanza.