RC Mwanza akagua Miradi ya Kimkakati na kumtaka Mkandarasi kuikamilisha kwa wakati

Mkuu wa Mkoa wa Mwanza Mhe.Mhandisi Robert Gabriel  amemtaka Mkandarasi wa Miradi ya Kimkakati Soko Kuu na Stendi mpya ya Nyegezi kuikamilisha ndani ya muda ili Wananchi wapate Maendeleo.

Mhe Mhandisi Gabriel amesema hayo wakati akifanya ziara ya ukaguzi wa Miradi hiyo akianzia Ujenzi wa Soko Kuu uliogharimu zaidi ya Shilingi Bilioni 22.

"Mliomba muongezewe miezi mitano sasa naamini huo muda ukifika ni makabidhiano hawa Wananchi siyo wa kuwacheleweshea Maendeleo, ni wa kuwaharakishia ili kuendana na kasi ya ukuaji wa Uchumi Mkoani Mwanza"

Mkuu wa Wilaya ya Nyamagana Mhe.Amina Makilagi amesema baada ya ukaguzi wa Mkuu wa Mkoa wajibu wao ni kuyapokea maagizo yote na kuyatekeleza ili Miradi hiyo ikamilike kwa wakati.

Naye Mhandisi wa Halmashauri ya Jiji la Mwanza, Norbert Mahenge amesema mpangilio wa Miradi yote kuanzia Soko Kuu na Stendi ya Mabasi itakuwa kitega Uchumi kizuri kwa Halmashauri ya Jiji la Mwanza na Wananchi watakaotumia fursa zilizopo.

Mradi wa Stendi mpya ya Nyegezi uliogharimu zaidi ya Shilingi Bilioni 15 unatarajia kukamilika Julai mwaka huu pamoja na Mradi wa Soko Kuu utakao kamilika Septemba mwaka huu.