TCRA Yawaonya matapeli wa Mitandao

Mamlaka ya Mawasiliano Tanzania (TCRA) imesema kuanzia Januari Mosi, 2020  kila mtu atatakiwa kumiliki laini moja ya kampuni moja ya simu ya mkononi.

Kauli hiyo imetolewa na Meneja wa TCRA kanda ya Ziwa, Mhandisi Francis Mihayo katika mkutano  wa wadau wa sekta ya mawasiliano  uliolenga kupokea kero na mapendekezo juu ya utendaji wa mamlaka hiyo.

Mkutano huo ulishirikisha viongozi wa dini mbalimbali,wamiliki wa vituo vya redio, mitandao ya kijami na mafundi simu ambapo wengi wao waliomba TCRA kushirikiana na  Mamlaka ya Vitambulisho vya Taifa (NIDA) ili kuweza kupata vitambulisho kwa wakati.

Mhandisi Mihayo alisema kwa mtu atakaye hitaji kuwa  na laini mbili atatakiwa kuandika maelezo ya uhitaji huo.

Alisema, imelazimika kuunda kundi maalum ‘group’ linaloshirikisha watoa huduma za mawasiliano  nchini kwa ajili ya kuziharibu simu za matapeli  wanaotuma ujumbe mfupi wa maneno (sms) kwa watu ili kujipatia fedha  kwa njia zisizo rasmi.

Pia imewaonya watu maarufu  wakiwamo wanasiasa wanatumia mitandao ya kijamii  kusambaza taarifa ambazo zinapotosha jamii kuhusu jambo lolote na kuwataka kuacha mamlaka husika au vyombo vya habari kusema kwa kuzingatia maadili ya kazi zao.

“Moja ya malalamiko sugu katika suala la mawasiliano ni watu kutumia ujumbe wa utepeli, kweli watu wametapeliwa sana, wapo wanaolalamika kupata ujumbe usiku na kusababisha  mgogoro katika ndoa lakini kama TCRA na watoa huduma tukaamua kuunda group letu la kuwashughulikia watu wa namna hiyo”alisema

Mhandisi Mihayo alisema TCRA  imeendelea kutoa elimu kwa jamii ikiwa ni pamoja na kufanya mikutano, kuchapisha majarida, vyombo vya habari lengo likiwa ni kujua namna ya kutumia sekta ya mawasiliano kwa faida na kuziomba taasisi za dini  kuelimisha waumini wao.

Alisema  mmomonyoko wa maadili  katika familia umetokana na wazazi kuwaruhusu  watoto wadogo kutumia simu za mikononi jambo ambalo linawafanya kuangalia picha za ajabu.

Mhandisi Mihayo alisema, baadhi ya watu maarufu wamekuwa wakitumia mitandao ya kijamii kuandika mambo yasiyo ya kweli  huku jamii  ikiwaamini kuliko vyombo vya habari vyenye leseni na kuwataka kuwa makini na taarifa wanazoweka mitandaoni kwani wanawafuatilia kwa ukaribu.