TUMESHINDA LAKINI BADO SIJARIDHISHWA NA KIWANGO DIMBANI:RC MTANDA

TUMESHINDA LAKINI BADO SIJARIDHISHWA NA KIWANGO DIMBANI:RC MTANDA

Ushindi wa bao 1-0 waliopata Pamba Jiji FC leo hii dhidi ya Fountain Gate haujamridhisha Mkuu wa Mkoa wa Mwanza Mhe.Said Mtanda na kuwataka wachezaji na dawati la ufundi kuongeza nguvu ya ziada kabla ya michezo miwili ya ugenini ya kuhitimisha ligi ya Championship.

Akizungumza na wachezaji hao mara baada ya mpambano huo uliopigwa kwenye uwanja mkongwe wa Nyamagana,Mkuu huyo wa Mkoa amesema michezo miwili iliyobaki ni migumu na inahitaji kazi ya ziada ya kujituma ili kutimiza lengo la kupanda ligi kuu msimu ujao.

"Hongereni kwa ushindi lakini ukweli hamkuonesha kiwango nilichokitarajia haiwezekani mnapata nafasi mara tatu za wazi tunashindwa kuzitumia,"Mkuu wa Mkoa.

Mhe.Mtanda amewakabidhi wachezaji hao shs milioni kumi na laki nne ukiwa ni muendelezo wa kuwapa motisha katika kila mchezo wanaoibuka na ushindi.

"Kocha Makatta tafadhali sana kaa na wachezaji wako kasoro zote za kiufundi mzifanyie kazi,wana Mwanza hawatatuelewa tumefanya vizuri karibu michezo yote halafu tunashindwa miwili iliyobaki,"amesisitiza Mhe.Mtanda

Nahodha wa timu hiyo Roland Msonjo akizungumza kwa niaba ya wenzake mara baada ya kukabidhiwa kitita hicho cha fedha amemuhaidi Mkuu wa Mkoa wataongeza bidii na kushinda michezo ya ugenini.

Bao pekee la Pamba Jiji FC limefungwa na mchezaji Suma Ally na kuifikishia timu hiyo pointi  61 ikiwa nafasi ya pili katika msimamo wa ligi ya Championship.