HALMASHAURI YA ILEMELA YAPATA HATI SAFI MIAKA 5 MFULULIZO RC MTANDA AIPONGEZA

HALMASHAURI YA ILEMELA YAPATA HATI SAFI MIAKA 5 MFULULIZO RC MTANDA AIPONGEZA

Mkuu wa Mkoa wa Mwanza Mhe. Said Mtanda ameipongeza Halmashauri ya Ilemela kwa kupata hati inayoridhisha kutoka Ofisi ya Mdhibiti na Mkaguzi Mkuu wa Hesbu za Serikali (CAG) kwa miaka mitano mfululizo.

“Halmashauri hii imepata hati inayoridhisha kwa miaka mitano mfululizo, mkipata hati hii maana yake ni kwamba hata msimamizi wa Halmashauri na Wilaya kwa ngazi ya Mkoa ni Mkuu wa Mkoa hivyo na Mimi nimepata hati inayoridhisha hongereni sana".  RC Mtanda katika kikao cha Baraza maalumu  la Madiwani kilichojadili taarifa ya CAG ya mwaka wa fedha 2022/2023 kwenye ukumbi wa halmashauri hiyo mapema leo Juni 26, 2024.

Hata hivyo, Mkuu huyo wa Mkoa amelitaka Baraza la Madiwani kuendelea kusimamia menejimenti ya halmashauri hiyo ili kuhakikisha inaendelea kupata hati inayoridhisha au safi miaka ijayo.

Aidha, RC Mtanda ameipongeza halmashauri hiyo kwa kuwa na hoja chache ambapo jumla walikuwa na hoja 29 za muda mrefu ambapo hoja 21 zilishafungwa na Halmashauri imebaki na hoja 8 za kujibu.

"Nimekuwa nikisikiliza hizi hoja nane na nimeridhika kuwa hoja hizi zitafutwa kwa kuwa mipango ya kuzifuta ipo na inawezekana, ninaiagiza Halmashauri hii kuhakikisha inajibu na kutekeleza kwa wakati hoja zote nane ambazo hazijatekelezwa".Mtanda

Mkuu huyo wa Mkoa ameitaka Halmashauri hiyo kuwasilisha mpango wa utekelezaji wa hoja zilizobaki kwa Ofisi ya Katibu Tawala Mkoa na namna zitakavyotekelezwa na kuziondoa kabisa ifikapo tarehe 28 mwezi wa sita mwaka huu.

Mhe. Mtanda amesisitiza pia kuhusu ushirikiano baina ya Ofisi ya Mkurugenzi Mtendaji wa Manispaa ya Ilemela na Ofisi ya CAG kwa hesabu za mwaka 2023/2024 ili waweze kuondokana na Hoja.

Naye Mstahiki Meya wa Manispaa hiyo, Mhe. Renatus Murunga ameahidi kutoa ushirikiano na kufanya kazi kwa bidii ikiwemo kuyasimamia maagizo yote yaliyotolewa na Mhe. Mkuu wa Mkoa, aidha amesema yuko tayari kwenda na kasi ya Mkuu huyo wa Mkoa.