RAS Mwanza awapa kongole Agha Khan foundation kwa Mchango Sekta ya Lishe

RAS Mwanza awapa kongole Agha Khan foundation kwa Mchango Sekta ya Lishe

Kaimu Katibu Tawala Mkoa wa Mwanza Daniel Machunda amewashukuru Agha Khan foundation kwa michango wanayotoa kwenye jamii kwa kushirikiana na Serikali katika upande wa sekta ya lishe huku akibainisha kuwa serikali inawathamini kwa dhati.

Ametoa pongezi hizo mapema leo Agosti 31, 2023 wakati akifungua Kikao cha Kamati ya Lishe ya Mkoa kilichoketi mahsusi kwa ajili ya kupitia na kusikiliza shughuli za Lishe ili kubainisha maeneo yanayohitaji usaidizi kwa ufadhili wa Shirika la Agha Khan foundation.

"Shirika la Agha Khan lina mchango mkubwa sana katika masuala ya Lishe na Sekta ya afya kwa ujumla ikiwa ni pamoja na kutoa huduma za matibabu kwa ujumla, watumishi wa afya tunapaswa kuunga mkono juhudi hizo kwa kushirikiana nao kwa karibu sana". Amesema Machunda.

Aidha, ametoa wito kwa wataalam kwenye Sekta ya lishe kuendelea kutoa elimu kwenye jamii kupitia makundi mbalimbali kuanzia ngazi ya Kaya, jamii na hata makundi ya kijamii na ili kuhakikisha suala la lishe linakua Agenda ya kudumu ili kujenga jamii iiliyoimarika kiafya.

Afisa Lishe Mkoa, Bi. Sofia Lazaro amefafanua kuwa Serikali inaendelea kuimarisha eneo la lishe nchini ndio maana Mhe. Rais anasaini Mkataba wa Lishe kwa Wakuu wa Mikoa ili kutekeleza afua za upatikanaji wa chakula chenye Lishe shuleni, upangaji na utoaji wa fedha za lishe kwa watoto chini ya miaka 5 na afua zingine.

Vilevile, amefafanua kuwa wanaume kutohusishwa kwa karibu kwenye masuala ya lishe, hali duni ya usalama kwa watoto, uelewa finyu wa jamii kwenye masuala ya lishe, lishe duni kwenye Kaya, unyonyeshaji usiofaa, mazingira magumu ya kijiografia ni matatizo yaliyopelekea utapiamlo kwenye jamii kwa muda mrefu na kwamba ni sehemu zinazofanyiwa kazi kwa karibu zaidi.

Meneja wa Afya na Lishe kutoka Agha Khan foundation David Siso ameishukuru Serikali ya Tanzania kwa ushirikiano na ameimwagia sifa Ofisi ya Mkua wa Mkoa wa Mwanza kwa kutekeleza afua za lishe kwa njia ya ushirikishaji wa pamoja ambayo amebainisha kuwa inasaidia kufikia malengo kwa wakati.