RC MAKALLA AFURAHISHWA NA MWENENDO MZURI WA PAMBA JIJI FC, AWAMWAGIA MINOTI

RC MAKALLA AFURAHISHWA NA MWENENDO MZURI WA PAMBA JIJI FC, AWAMWAGIA MINOTI

*Awajaza Shs Milioni 5 kama motisha ya kuiangamiza Biashara FC*

*Atangaza tarehe 3 Februari 2024 kuwepo Harambee ya kuichangia Pamba Jiji FC*

*Awahimiza kukaza buti uwanjani kutimiza malengo ya kucheza Ligi kuu msimu ujao*

Leo Januari 26, 2024 Mkuu wa Mkoa wa Mwanza Mhe.CPA Amos Makalla amefanya mkutano wa kawaida na wachezaji na timu ya soka ya Pamba Jiji FC na kuwakabidhi kibunda cha Milioni 5 kama motisha ya kuendelea kutoa dozi dimbani katika michezo yake ya Ligi ya Championship.

Mkutano huo uliofanyika kwenye ukumbi wa Ofisi yake ulioambatana na chai ya pamoja, Makalalla ambaye pia ni mlezi wa timu hiyo amebainisha amezidi kukunwa na kiwango cha timu hiyo na muendelezo wa ushindi katika michezo yao.

"Mimi ugonjwa wangu ni mpira wa miguu mkinifurahisha katika eneo hili nanyi mtaona matunda yake,hongereni sana kwa kiwango kizuri mlichoonesha katika mpambano wenu dhidi ya Stendi Utd". Mkuu wa mkoa

Amesema mchezo ujao dhidi ya Biashara United kutoka Mara hana shaka ya kushuhudia pointi nyingine 3 zikiendelea kuvunwa na kuzidi kujiimarisha nafasi ya juu katika msimo wa Ligi hiyo.

"Niliwaleta wachezaji 5 kutoka Congo DRC kwa majaribio lakini mwisho wa siku wote hawakuonesha kiwango cha kulishawishi dawati la ufundi kuwasajili,lakini nyie baadhi yenu tuliowaongeza dirisha dogo mpo vizuri hongereni",amesisitiza mlezi huyo aliyecheza pia soka miaka ya nyuma.

Mkuu huyo wa Mkoa amesema ili kuhakikisha wana TP Lindanda wanazidi kuwa tishio mwanzoni mwa mwezi ujao ataandaa harambee ya kuichangia timu hiyo lengo ni kuzidi kuwapa hamasa na motisha wachezaji hao ili kutimiza malengo ya kucheza Ligi kuu msimu ujao.

Amezidi kuwakumbusha wananchi wa Mwanza kuendelea kushikamana na kuwapa ari wachezaji wa Pamba Jiji FC kwa kujitokeza kwa wingi dimbani katika michezo yake ya nyumbani na hata ugenini

"Hiki unachokifanya Mhe.Mkuu wa Mkoa hata mimi unanirahisishia kazi yangu yaani inakuwa nyepesi kutokana na wachezaji ari ya kujituma na kuyashika maelekezo ya kiufundi inakuwa nzuri,"Mbwana Makatta,kocha wa Pamba Jiji FC

Katika msimamo wa Ligi ya Championship wana TP Lindanda wanashikilia nafasi ya pili na mtaji wa pointi 40 kibindoni.