RC Malima aipongeza Serikali kwa kuboresha huduma Sekta ya afya

Mkuu wa Mkoa wa Mwanza Mhe. Adam Malima amesema ni muhimu kuimarisha njia za upatikanaji wa dawa, vifaa tiba na vitendanishi  ili kuhakikisha   huduma bora kwa wananchi zinatolewa kwenye vituo vya afya nchi nzuma

Hayo yamesemwa leo Mei 6 2023 na Katibu Tawala wa Mkoa wa Mwanza Ndg. Balandya Elikana kwa niaba ya Mkuu wa Mkoa wakati akifungua mafunzo ya siku tatu kuhusu mfumo mpya wa mshitiri  katika ukumbi wa Ofisi ya Mkuu wa mkoa.

"Ni muhimu sana kuimarisha upatikanaji wa dawa, vifaa tiba, vifaa saidizi na vitendanishi kulingana na mahitaji ya vituo vya afya katika ngazi zote za utoaji huduma nchini  na kuhakikisha  huduma bora zinatolewa kwa wananchi," Amesema Mtendaji huyo wa Mkoa

Ndg. Balandya ameipongeza  Ofisi ya Rais - Tawala za Mikoa na Serikali za Mitaa (TAMISEMI) ambao ndio wawezeshaji wa mafunzo hayo kwa kuendelea kuboresha mfumo wa mshitiri na endapo utasimamiwa vizuri utasadia upatikanaji wa dawa, vifaa tiba na vitendanishi.

" Niipongeze Ofisi ya Rais - TAMISEMI kwa kuendelea kuboresha mfumo wa mshitiri na ni matumaini yangu na Serikali kuwa mfumo huu endapo utasimamiwa vizuri utasaidia  katika upatikanaji wa dawa, vifaa tiba na vitendanishi zinazokosekana katika Bohari la Dawa," Amesema Ndg. Balandya.

Aidha  Kaimu Mganga Mkuu wa Mkoa wa Mwanza, Claudia Kaluli amesema  Ofisi ya Rais- TAMISEMI  ikishirikiana na wizara ya afya imeleta mfumo wa uagizaji dawa ambazo zitakua hazipatikani katika Bohari la Dawa ambao ni rahisi.

" Ofisi ya Rais- TAMISEMI  ikishirikiana na wizara ya afya imeleta mfumo wa uagizaji dawa ambazo zitakuwa zinakosena katika Bohari la Dawa  ambao ni rahisi na utasaidia kuweza kushirikiana na wauzaji binafsi,"  Amesema  Kaluli

"Huu ni mfumo ambao tunaimani unakuja kuleta mageuzi chanya kwenye Sekta yetu ya afya kutokana na upatikanaji wa haraka wa dawa na usahihi wa nyaraka husika",Julius Shigella,Mratibu wa huduma za Maabara na damu salama Mkoa.

Ilani ya Chama cha Mapinduzi ya Uchaguzi Mkuu wa Mwaka 2023  iliweka bayana na kawaahidi wananchi kuimarisha mifumo ya upatikanaji wa dawa, vifaa tiba na vitendanishi  na kuimarisha ushirikiano na sekta binafsi katika utoaji wa huduma za afya.

Washiriki wa mafunzo hayo ni Wakurugenzi kutoka Halmashauri zote za Mkoa wa Mwanza,Waganga wakuu wa Wilaya,Maafisa TEHAMA,waratibu wa huduma za Maabara na Maafisa ugavi.