RC MTANDA AONGOZA WAOMBOLEZAJI MAZISHI YA MTOTO WA KATIBU WAKE

RC MTANDA AONGOZA WAOMBOLEZAJI MAZISHI YA MTOTO WA KATIBU WAKE

Mkuu wa Mkoa wa Mwanza Mhe. Said Mtanda leo Novemba 16, 2024 amewaongoza watumishi wa Ofisi yake na waombolezaji katika mazishi ya mtoto wa katibu wake Faith Matia Levi.

Akitoa salamu za rambi rambi kwa niaba ya Mkuu wa mkoa kwenye Kanisa la KKKT Usharika wa Imani, Mkuu wa Wilaya ya Ukerewe Mhe.Christopher Ngubiagai  amewataka familia ya Bw.Matia Levi kusimamia imara na kumtumainia Mwenyezi Mungu katika kipindi hiki kigumu cha kuondokewa na kipenzi chao.

Amesema siku zote kifo huwa hakizoeleki na kinakuja pasipo kutarajia hivyo wanapaswa kumshukuru Mungu kwa kila jambo.

"Nawashukuru wote tulioguswa na msiba huu tangu taarifa ilipotolewa na kuwafariji wafiwa, tuendelee kuwatia nguvu na moyo wafiwa katika muda huu wa maombolezo", DC Ngubiagai.

Awali akitoa mahubiri wakati wa ibada ya mazishi mchungaji wa kanisa hilo amesema mwanadamu hana sababu ya kuwa na hofu ya kifo kwani siku yake ya kurejea kwa Mungu ipo hivyo wajibu wake ni kuishi kwa furaha kwa kumtumainia Mungu.

"Leo wafiwa wana huzuni ya kumpoteza mtoto wao, lakini hili ni fumbo kwa Mungu la kumtwaa Faith akiwa na umri mdogo ili akapate nafasi zaidi ya kutuombea na sisi tunaondelea na zawadi hii ya uhai", Mchungaji Mahisa.

Akitoa historia fupi ya marehemu, mama mdogo wa marehemu amesema Faith alizaliwa Februari

06, 2019 hospitali ya Kanda ya Bugando akiwa ni mtoto wa tatu kuzaliwa ambaye hadi mauti yanamkuta hospitali ya Mkoa ya rufaa ya Sekou Toure Novemba 13, a024 alikuwa darasa la awali shule ya msingi Nyakahoja huku akiwa na ndoto za kuwa daktari wa hospitali ya Sekou Toure.

Salamu mbalimbali za rambi rambi zimetolewa kwa wafiwa ikiwemo Ofisi binafsi ya Waziri Mkuu Mhe.Kassim Majaliwa Majaliwa, Taasisi za Umma,Taasisi za dini, umoja wa wabunge Mkoa wa Mwanza na makundi mengine mbalimbali yanayoshirikiana na Ofisi ya mkuu wa mkoa wa Mwanza

Marehemu Faith Matia amepumzishwa kwenye nyumba yake ya milele alasiri ya Novemba 16, 2024 Kisesa wilayani Magu ambako ni eneo la familia.

Bwana ametoa Bwana ametwaa jina lake lihimidiwe.