Makinda awataka wasomi na wananchi kuyatumia matokeo ya Sensa ya Watu na Makazi kujiinua kiuchumi

Posted on: March 29th, 2023

Kamisaa wa Sensa ya Watu na Makazi mwaka 2022, Mheshimiwa Anne Makinda amewashauri wasomi na Wananchi Nchini kutumia takwimu za sensa ya watu na Makazi katika kubuni biashara ili waweze kujikwamua kiuchumi.

Mheshimiwa Makinda ametoa ushauri huo leo Machi 29, 2023 wakati akizungumza na   wananchi pamoja na viongozi kutoka makundi mbalimbali Wilaya ya Ilemela Mkoani Mwanza kuhusu matumizi ya Matokeo ya  Sensa ya watu na Makazi  2022 katika kupanga  na kutekeleza Mipango ya Maendeleo.

 Amesema  Serikali haikufanya sensa ili takwimu  hizo zikae kwenye shelfu zake bali ziwasaidie watanzania kuona fursa ili wazitumie kujikwamua kiuchumi wao na taifa kwa ujumla.

Amesema kwa mujibu wa sensa ya Watu na Makazi ya mwaka 2022  zaidi ya nusu yao  ni kundi lenye uwezo wa kufanya kazi hivyo wote wakishiriki kikamilifu katika shughuli za kiuchumi watajikwamua wao, familia zao na taifa kwa ujumla.

 "Tuanze kufikiri kitakwimu badala ya kufanya kazi kama watu tuliofungwa kitambaa usoni, sensa iwafungue wasomi na vijana kuona fursa, fanyeni biashara na dunia nzima  kimtandao.

"Fursa zinakwenda na wakati hazirudi mara mbili ukichelewa zitakuacha  wasomi acheni kuchagua kazi  kikubwa ninachoweza kuwashauri  kuweni waaminifu   tatizo letu asilimia kubwa si waaminifu kama tukiendelea kufanya kazi kwa udanganyifu kama ambavyo wengi wetu walivyozoea itakula kwetu," amesema Mheshimiwa Makinda na kuongeza.

"Ukichagua kazi hautapata kazi mpaka utastaafu(utazeeka) kabla ya kuajiriwa,"amesema.

Akizungumzia kuhusu takwimu za Sensa ya Watu na Makazi ya mwaka 2022, Mheshimiwa Makonda amewashukuru watanzania kwa kujitokeza kwa wingi kuhesabiwa hali iliyosaidia zoezi hilo kufanikiwa kwa kiwango kikubwa.

Mkuu wa Wilaya ya Ilemela Mkoani Mwanza Hassan Masala amesema Wilaya hiyo ilitekeleza zoezi la sensa kwa heshima na umakini mkubwa ndiyo maana wamepata fursa ya kuwa miongoni mwa maeneo ya mfano ambayo Kamisaa Makinda amewapendekeza kuyafikia.

"Wilaya ya Ilemela tulitekeleza zoezi la sensa ya watu na Makazi iliyofanyika mwaka jana kwa weledi mkubwa na tuko tayari kuyafanyia kazi maelekezo yote utakayotoa leo,"amesema Mheshimiwa Masala

Naye Meneja Takwimu wa Mkoa wa Mwanza, Goodluck Lyimo amesema  asilimia kubwa  ya wakazi wa mkoa huo walijitokeza kuhesabiwa  hali iliyosaidia kufanikisha zoezi hilo kwa kiwango kikubwa.