Polisi mwanza Yawashikilia watuhumiwa wa utekaji na wezi sugu

Posted on: July 9th, 2019

Jeshi la Polisi Mkoa wa Mwanza linawashikilia watumiwa sugu 46 wanaojihusisha na makosa mbalimbali  yakiwamo   unyanganyi, kupatikana na dola bandia ,wizi wa vifaa vya magari,utumiaji wa madawa ya kulevya.

Akizungumza na wandishi wa habari jana,  Kamanda wa Polisi  Mkoa wa  Mwanza, Jumanne Muliro alisema kati ya watuhumiwa hao wamo wahalifu sugu 21 wa matukio ya unyaganyi  wa injivi za wavuvi ndani ya Ziwa Viktoria katika  maeneo ya  kisiwa cha  Kunee, Bwiro, Kweru na Ilugwa, Bezi na Makoba  vilivyopo wilaya ya   Ukerewe na Ilemela.

Alitaja maeneo yalivamiwa na wahalifu hao ni visiwa vya Kasarazi, Zilagura, Iyozu na Maisome wilayani Sengerema ambapo watuhumiwa hao walikamatwa wakiwa na injini 21 za mitumbwi, nyavu haramu 195 na pikipik mbili.

“Katika msako huo kwa nyakati tofauti tumefanikiwa kuwakamata watuhumiwa sita wa makosa ya utapeli wa dolla bandia  za Marekani noti 599  ambapo kila moja ni dola 100.

“Vile vile tuliwakuta na noti 32 za Sh 10,000 za Tanzania  ambazo ni sawa na Sh 320, 000 kama zingekuwa  halali, watano kati ya hao walikamatwa wilayani Nyamagana  na mmoja aliyekuwa na dola alikamatwa Sengerema.

“Pia tumewakama wezi tisa wa vifaa vya magari  yaani vipuri kwenye makazi ya watu, walikutwa na ushahidi mbalimbali ikiwemo taa za magari, vitasa, radio za gari na  vioo,” alisema Muliro.

Aliwataja baadhi ya watu wanaoshikiliwa na kusubiria upelelezi ili kufikishwa mahakamani ni Muhoja Magendo, Peter Timoteo, Dotto Malemu, Mashaka Masanja, Emmanuel Zafania, Joseph Daniel, Fred Daniel, Oscar Haji, Samwel Paulo, Rajab Ibrahim, Tomas Christopher.

Wengine ni Phinias Elija, Shaban Nassoro, William Yamo, Issa Ngoreke, Elias john, Mariam Joseph, Yusuph Lukanyaka na Chausiku Wankuru.

Hata hivyo Kamanda Murilo alionya baadhi ya watu kutojihusisha na vitendo vya uhalifu na kuwataka kufanya shughuli zao halali.