RC Makalla atembelea rasmi Ofisi ya CCM Mkoa na kujitambulisha

Posted on: May 30th, 2023

*RC Makalla atembelea rasmi Ofisi ya CCM Mkoa na kujitambulisha*

 *Aahidi kutanguliza maslahi mapana ya CCM na ushindi wa chaguzi zijazo*

*Ahimiza mshikamano baina ya Serikali na CCM*

Mkuu wa Mkoa wa Mwanza Mhe Amos Makalla ametembelea leo Ofisi za Chama cha Mapinduzi Mkoa kwa lengo la kujitambulisha na kuahidi kutoa ushirikiano wa kutosha baina ya Serikali na Chama.

Akizungumza na uongozi wa Chama hicho, Mkuu huyo wa Mkoa amebainisha mshikamano wa pamoja ndiyo utatimiza malengo yote kama Ilani ya Chama inavyotaka.

"Tangu nimeingia hapa kuanza rasmi kazi nimesema wazi bila kificho nitatanguliza maslahi mapana ya Chama cha Mapinduzi, nikitambua sisi viongozi  chimbuko letu ni CCM",Amesisitiza Mkuu huyo wa Mkoa.

Mhe.Makala amebainisha akiwa mjumbe wa Kamati ya siasa ya Mkoa atahakikisha chaguzi zote zilizopo mbeleni wanatoka na ushindi kuanzia ngazi zote.

Akizungumza kabla ya kumkaribisha Mkuu huyo wa Mkoa, Mwenyekiti wa CCM Mkoani Mwanza Mhe.Sixbeth Gichagu amesema wamefurahi kumpata Mkuu wa Mkoa ambaye anakijua kwa undani Chama hivyo uzoefu wake utakuwa chachu ya kufikia malengo ya Ilani ya uchaguzi.

"Binafsi Mhe.Mkuu wa Mkoa amenilea ndani ya Chama na amekuwa akinipa ari na maelekezo mbalimbali hadi nimefikia hatua hii ya nafasi ya Mwenyekiti". M/kiti CCM Mkoa.

Mhe.Amos Makalla ameshika nafasi mbambali ndani ya CCM ikiwemo Naibu Katibu Mkuu wa Umoja wa Vijana na Mhazini wa CCM Taifa na  hoja yake kukubaliwa kwa baadhi ya Mikoa yenye misuli ya kiuchumi kama Mwanza, Dar-es-Salaam na Arusha kujitegemea katika kujiendesha badala ya kutegemea ruzuku ya Chama.