RC Malima awataka Wakurugenzi wa Halmashauri kutenga fedha za Lishe kwa wakati

Posted on: February 10th, 2023

MKUU wa Mkoa wa Mwanza, Mhe. Adam Malima amewaagiza  wakurugenzi  wa halmashauri zote mkoani humo kutenga na kuwasilisha  fedha za kutekeleza afua za lishe kwa wakati  ili kuepuka udumavu kwa watoto na kutengeneza kizazi cha watu wenye ufahamu.

Mhe. Malima ametoa agizo hilo Mkoani humo leo Februari, 10, 2023  wakati akizungumza kwenye kikao cha tathmini ya utekelezaji wa mkataba wa lishe na utambulisho wa mfumo wa M-Mama ambao lengo lake ni kuokoa maisha ya wanawake wajawazito, waliojifungua na watoto wachanga wanapokuwa na dharura za kiafya.

Agizo hilo la Mhe. Malima amelitoa baada ya Afisa Lishe wa Mkoa  huo, Sophia Lazaro kutoa taarifa ya utekelezaji wa afua za lishe kuanzia Julai hadi Desemba  2022 iliyobainisha kwamba miongoni mwa changamoto wanazokabiliana nazo kuwa ni pamoja na baadhi ya halmashauri kutotoa fedha zilizotengwa na serikali  kwa wakati ili  kuwezesha utekelezaji wa afua za lishe pia hazilingani na idadi ya watoto.

Ameziagiza  kila halmashauri kutoa fedha zote  za utekelezaji wa afua za lishe ifikapo Juni 30 mwaka huu kwa kufuata miongozo iliyopo kwani kila  kiongozi wakiwemo wakurugenzi wanapaswa kulipa kipaumbele suala la lishe ili kutengeneza taifa lenye watu watakaoendeleza taifa lakesho .

 “Mhe. Rais Samia Suluhu Hassan  ameipa kipaumbele ajenda hii ya lishe tangu akiwa Makamu wa Rais na sasa ni Rais,  ili kutengeneza taifa bora la kesho kwa sababu watoto wanaokabiliwa na changamoto ya utapiamlo nao  wanategemewa kuendeleza nchi hapo baadaye ndiyo  maana serikali  inawajali ili waweze kuimarika kiafya, hivyo sitarajii kuona kiongozi yeyote hasa sisi ambao tunamsaidia Mhe.  Rais Samia Suluhu Hassan Kumkwamisha kwa namna  yoyote ile,”amesisitiza Mhe. Malima.

Katibu Tawala wa Mkoa huo, Balandy Elikana amesema” Kwa kipindi hiki ambacho kimebaki cha miezi minne ya utekelezaji wa bajeti ya mwaka 2022/2023 tuchukue hatua zinazostahili kuhakikisha tunatekeleza makubaliano yaliyopo kwenye mkataba”.