"Watumishi Tatueni kero za wananchi" - Mongella

Posted on: June 9th, 2019

Mkuu wa Mkoa wa Mwanza Mhe John Mongella, amewaonya na kuwataka watumishi wa Mkoa huo kufanya kazi pamoja na kutatua kero za wananchi.

Mhe Mongolla aliitoa  onyo hilo katika kikao cha upokeaji  taarifa ya utekelezaji wa  zoezi la  uanzishwaji wa chanjo ya saratani ya mlango wa kizazi  Tanzania (HPV) kwa wasichana wenye umri wa miaka 14 mkoa wa Mwanza.W

Mhe Mongella alisema, Kila mtumishi akifanya kazi bila visingizio, kuwajibika kwa nafasi yake na kutekeleza mipango na maelezo ya Serikali, suala la wananchi kujitokeza na mabango ya malalamiko kwa viongozi wa Kitaifa litapungua.

“Sipendezwi na mabango ya wananchi yanayoonesha awatatuliwi kero zao, na yeyote atakayezembea kuwahudumia wananchi kwa nafasi yake na malalamiko yakajitokeza kwa viongozi wa Kitaifa atawajibishwa”,alisema Mhe Mongelle

Aliongeza pia, wapo baadhi ya watumishi wanakwamisha mipango ya Serikali kutokana na tabia yao ya kuwa na  visingizio vingi, kutaka wabembelezwe  kutimiza wajibu wao na kuwataka Wakuu wa Wilaya na Wakurugenzi wa Mkoa wa Mwanza kuwasilisha taarifa ya utekelezaji wa miradi kila baada ya miezi mitatu.

 “Twendeni vijijini tukawahudumie wananchi, mfano katika hili la saratani linakwamisha sana maendeleo kwani mama mmoja akiwa na saratani lazima familia itayumba hata kama wana uwezo wa fedha, tambueni asilimia 80 ya shughuli za nyumbani zinafanywa na mama,bila kusimamia afya na uhai wa watu tutakuwa tunajidanganya kupata maendeleo”alisema

Naye Afisa wa Mpango wa Taifa, Kitengo cha chanjo ya saratani ya mlango wa kizazi  Tanzania (HPV)  kutoka wizara ya afya, Pricilla Kinyunyi alisema kwa mujibu wa takwimu kutoka  Shirika la Afya Duniani (WHO) zinaonyesha jumla ya watanzania 50,000 wanapata maambukizi mapya na asilimia 70 ya wagonjwa hao wanajitambua wakiwa katika hatua ya nne ambayo ni hatari.

Alisema asilimia 36 ya wagonjwa hao waliogundulika na saratani  wanapoteza maisha, hivyo aliwashauri wazazi kuwatunza mabinti wao na kuwashauri kuepuka  kuanza ngono mapema sambamba na  kuwahimiza kupata chanjo wanapofikisha umri wa miaka 14.