Waziri Mhagama awataka Watumishi Magu kufanya kazi kwa kujituma

Posted on: February 22nd, 2023

Waziri wa Nchi, Ofisi ya Rais Menejimenti ya Utumishi wa Umma na Utawala bora Mhe. Jenista Mhagama ametoa rai kwa watumishi wa Umma wilayani Magu kufanya kazi kwa bidii katika kuwahudumia wananchi ili kuboresha huduma za kijamii.

Amesema Serikali ya Awamu ya Sita ya Rais Samia Suluhu Hassan imejipambanua kuwahudumia wananchi kwa

viwango vya ubora wa juu hivyo ni wajibu wa kila  mtumishi wa umma kujituma katika kusimamia miradi na kuhudumia wananchi ili wananchi wapate huduma bora za kijamii kama Maji, Afya, Elimu na pembejeo za Kilimo.

"Wananchi wakisema wanapata huduma nzuri basi ni mazao ya utumishi bora wa umma na wakilalamika basi ni zao la kutowatumikia vizuri, nawaomba tuwe na utumishi wa umma unaojali haki na wajibu kama Rais Samia mwenyewe alivyoagiza wakati akilihutubia Bunge kwa mara ya kwanza." amesema Waziri Mhagama.

Ndani ya miaka miwili watumishi 116792 wamekwishalipwa madai ya mishahara, nakuagiza Mkurugenzi kupitia maafisa Utumishi wako kuendelea kulipa madeni ya watumishi kupitia mfumo wa digitali ambao una ufanisi mkubwa hususani watendaji wa vijiji na kata ambao waliondolewa kazini na  kurejeshwa mwaka  2017/18.

"Kwa miaka karibia saba, watumishi wa Umma tulikua hatujapandishiwa mshahara lakini ameingia mama ametuongezea kwa asilimia 23 hivyo tunamshukuru sana Rais Samia kwa upendo huo na ametuboreshea sana mazingira ya kazi kwa sasa", Amesema Daniel Sanyenge, Katibu wa Chama cha Wafanyakazi wa Serikali za Mitaa (TALGWU) wilaya ya Magu.