Walimu wa shule binafsi watakiwa kufichua uovu

Posted on: October 8th, 2018

Wamiliki na  walimu wa shule za binafsi wametakiwa kufuata sheria ya uajili kwa kutoajiri vishoka na walimu kutoka nchi jirani bila vibali.

Akizungumza kwenye uzinduzi wa kongamano la Kitaalama la Kitaifa la Walimu wa Shule zisizokuwa za Kiserikali  nchini Naibu Katibu Mkuu wa Wizara ya Elimu, Sayansi na Teknolojia Avemaria Semakafu  kwa niaba ya Waziri wa Elimu Mhe. Prof.Joyce Ndalichako alisema walimu wa shule za binafsi wnaficha maovu ikiwemo suala la wizi wa mitihani.

"Maovu makubwa yanafanyika katika shule binafsi ambayo watekelezaji wake ni nyinyi walimu, unakuta mwalimu anafundisha siyo raia wa Tanzania na hana vibali lakini tukijua mnawatetea," alisema Semakafu.

Semakafu ameongeza kuwa Wizara yake isingetaka kuona Elimu yetu inayumba nchini.

Naye Katibu Tawala Msaidizi wa Mkoa wa Mwanza anayehusika na Masuala ya Elimu Michael Ligola aliwasisitiza walimu wafuate taratibu, kanuni na sheria zote ili kuhakikisha wanatenda haki.

"Malanyingi tumepata malalamiko hasa Shule binafsi kuwa wanaenda kinyume na taratibu zilizowekwa ikiwemo ukaririshwaji wa wanafunzi, "alisema Ligola.

Aliongeza kuwa kwa mujibu wa sheria mwenye uwezo wa kukaririsha wanafunzi ni kamshina Mkuu.

"Endapo itagundulika kuwa kuna shule iwe ya Serikali au Taasisi inakaririsha mwanafunzi kisa hajatimiza kigezo cha kuingia kidato kingine bila kibali cha Kamishina hakika tutachukua hatua,"alisema Ligola.

Naye Bwana  Julius Mabula Katibu Mkuu wa Chama cha walimu shule binafsi Tanzania alisema, wanakabiliwa na changamoto ya baadhi ya waajili kutofuata sheria na taratibu ikiwemo kutishia au kuwafukuza kazi wakijiunga na chama chao.

"Waajiri wamekuwa wakiachishwa kazi walimu wanaojiunga kwenye chama chetu tukifuatilia tunaambiwa mwalimu kaondolewa kwa kukosa sifa," alisema Mabula.