ASKOFU SANGU ATETA NA RC MTANDA

Posted on: August 13th, 2024

ASKOFU SANGU ATETA NA RC MTANDA

Mhashamu Baba Askofu Mkuu wa Kanisa Katoliki Jimbo la Shinyanga Askofu Liberatus Sangu amemtembelea Ofisini kwake Mkuu wa Mkoa wa Mwanza Mhe. Said Mtanda mapema leo Agosti 13, 2024 kwa lengo la kumsalimia na kumkaribisha katika sherehe za uzinduzi wa Jimbo jipya la Bariadi zinazotarajiwa kufanyika hivi karibuni.

Akizungumza katika kikao kifupi,  Baba Askofu amesema kama ilivyo katika upande wa serikali ambapo maeneo ya utawala huboreshwa ili kuwafikia wananchi ndivyo ilivyo pia katika upande wa kanisa hilo ambapo wanatarajia kuligawa Jimbo la Shinyanga ili kuweza kurahisisha huduma na kuwafikia waumini wao kwa karibu zaidi.

"Taratibu za maandalizi bado zinaendelea za kumkaribisha Askofu wa Jimbo jipya la Bariadi mara baada ya Baba Mtakatifu kuridhia, Mchakato pia bado na wakati wowote taarifa rasmi zitatolewa". Askofu Sangu.

Sambamba na hayo Askofu huyo pia ametumia wasaa huo kumkaribisha Mkuu wa Mkoa kushiriki katika maandalizi na ikiwezekana pia hata katika sherehe hizo wakati utakapowadia, aidha amemtaka Mhe. Mtanda kuwataarifu Wahe. Wakuu wa Mikoa ya Kanda ya Ziwa kwa kuwa yeye ndiye Mwenyekiti wa Wakuu wa Mikoa wa Kanda hiyo.

Kwa upande wake Mhe. Mtanda amemtoa hofu Baba Askofu kwa kumuhakikishia kuchangia kiasi cha Shilingi milioni tatu (3) katika maandalizi ya shughuli hiyo na kumuahidi kushiriki kikamilifu katika sherehe hiyo.

"Nimekuwa na mahusiano mazuri na kanisa katoliki kwa kipindi kirefu, tangu nikiwa DC kwa kipindi cha miaka saba, hata Askofu Msoganzila wa Bunda na yeye amesema ana sherehe zake hapa Mwanza nami nitamuunga mkono"  Mhe. Mtanda.

Aidha Mkuu huyo wa Mkoa wa Mkoa amesema yeye binafsi ana dini yake lakini serikali haina dini hivyo ameahidi kutoa ushirikiano wa kutosha kwa viongozi wa dini na madhehebu mbalimbali.