BARABARA YA USAGARA - MWANZA MJINI KM 25 KUJENGWA KWA NJIA NNE

Posted on: January 25th, 2025

BARABARA YA USAGARA - MWANZA MJINI KM 25 KUJENGWA KWA NJIA NNE

Waziri wa Ujenzi, Abdallah Ulega, amesema Serikali kupitia Wizara ya Ujenzi inachukua hatua  za haraka kushughulikia msongamano wa magari kwenye Barabara Kuu kutoka Mwanza Mjini hadi Usagara kwa kuijenga kwa njia nne.

Ulega amesema hayo mkoani Mwanza wakati akizungumza na wananchi wa Buhongwa na kuongeza kuwa  Rais wa Jamhuri ya Muungano wa Tanzania, Dkt. Samia Suluhu Hassan, amempa maelekezo ya kutafuta mkandarasi kwa ajili ya ujenzi huo  ambapo Barabara mbili zitatoka Mwanza Mjini kuelekea Usagara na nyingine mbili kutoka Usagara kwenda Mwanza Mjini.

“Tumepanga kuhakikisha kuwa mchakato wa kumpata mkandarasi unakamilika ifikapo katikati ya Februari mwaka huu na baada ya kumpata mkandarasi, tutakuwa hapa Buhongwa kumkabidhi rasmi eneo la mradi ili aanze kazi mara moja ya ujenzi wa hizi kilomita 25 za barabara hii”, amesema Waziri Ulega.

Aidha, ameeleza kuwa katikati ya Barabara hizo kutakuwa na eneo la wazi kwa ajili ya mipango ya baadaye na kuongeza kuwa Taa za Barabarani zitawekwa kwa wingi ili kuboresha usalama hasa kutokana na shughuli nyingi za biashara zinazofanyika usiku na mchana katika eneo hilo.

Katika hatua nyingine Waziri Ulega ameagiza hifadhi za Barabara zinazotumiwa na wafanyabiashara wadogo zijengwe kwa ubunifu, huku akiwasihi viongozi wa Wilaya kushirikiana na wawekezaji kuhakikisha maeneo hayo yanaboreshwa kwa gharama nafuu.

“Rais Samia amekuwa mstari wa mbele kubuni njia za kuwasaidia wananchi kufanya biashara kwa ufanisi ni jukumu letu kuhakikisha tunatengeneza mazingira mazuri ya kiuchumi kwa kila mtanzania kupata riziki yake,” aliongeza.

Ujenzi wa Barabara nne, uwekaji wa Taa za Barabarani, na kubuni njia za usalama kwa wananchi si tu kutapunguza msongamano na ajali, bali pia kutaimarisha uchumi wa eneo hilo na maisha ya watu kwa ujumla.