Dkt.Mpango aagiza uadilifu utekelezaji miradi ya maendeleo

Posted on: April 11th, 2023

Makamu wa Rais Mhe.Dk t. Philip Isdor Mpango ameiagiza Wizara ya Ofisi ya RaisTawala za Mikoa na Serikali za Mitaa( OR- TAMISEMI) kuona namna ya kuongeza mabweni katika shule sita za Sekondari zilizopo  Jimbo la Kwimba Mkoani Mwanza ili  kuwaondolea changamoto ya umbali na vishawishi kutoka kwa wanaume wanafunzi wa kike.

Pia amewaasa wananchi kutunza miundombinu ya miradi mbalimbali ya maendeleo inayotekelezwa na Serikali ili idumu na kuwahudumia kwa muda mrefu kwani fedha zinazotumika kuijenga ni zao wote kwa kuwa wanalipa kodi.

Mhe.Dkt.Mpango ametoa maagizo hayo leo Aprili 11,2023 wakati akiwasalimia wananchi wa Kata  ya Hungumalwa Wilaya ya Kwimba Mkoa wa Mwanza akiwa katika ziara ya kikazi mkoani humo.

Mhe.Dkt.Mpango alitoa agizo kwa TAMISEMI baada ya Mbunge wa Jimbo la Kwimba Atlaf Mansoor kuiomba Serikali kujenga mabweni na maabara   kwenye shule  sita zilizopo Kata  ya  Hungumalwa ili wanafunzi waweze kulala shuleni waepuka vishawishi mbalimbali vinavyowasababishia kushindwa kuhitimu masomo yao na  kutimiza ndoto zao.

Mhe.Dkt.Mpango aliwasihi wazazi na walezi kuwapeleka watoto wao shule ili wasome na kupata elimu  na utaalamu katika sekta mbalimbali kwa faida ya taifa.

"Ili kujenga taifa la kesho lenye vijana na watu wenye uwezo mkubwa wa kufikiri   lazima watoto wetu waende shule pia naomba taasisi binafsi, za serikali na wadau wote wa maendeleo ifundisheni jamii kuhusu  umuhimu wa  lishe bora hasa kwa watoto na akina mama wajawazito,"amesema.

Akizungumzia umuhimu wa wananchi kutunza miundombinu, Mhe.Dkt. Mpango amesema serikali imetoa fedha nyingi  katika mikoa yote nchi nzima kwa ajili ya miradi  ya  maendeleo  ili iwanufaishe  wananchi wake na kuwaondolea changamoto mbalimbali zinazowakabili.

"Viongozi na wananchi wote mshiriki kikamilifu kwenye miradi hiyo, wananchi muitunze na viongozi wa umma muwe waadilifu wa fedha hizo za umma zinazotumika kujenga miradi hiyo  ili  ijengwe  kwa ubora ikiwa na  thamani halisi ya fedha zilizotengwa,"amesema Mhe. Dkt.Mpango.

Kwa upande wake Mkuu wa Mkoa wa Mwanza Mhe.Adam Malima akizungumzia hali ya utoro mkoani humo  amesema   hadi mwishoni mwa Februari mwaka huu  2023 baadhi ya wanafunzi walikuwa

 bado hawajaripoti shuleni lakini uongozi wa mkoa  kwa kushirikiana na halmashauri husika wanaendelea kufanya jitihada mbalimbali ili kutatua  changamoto hiyo .