Gereza la Butimba lajikita katika kiwanda cha Ushonaji

Posted on: July 5th, 2019

Naibu Waziri wa Mambo ya Ndani ya Nchi, Hamad  Masauni  amesema kasi ya uingizaji wa vitu haramu na biashara ndani ya magereza nchini uliifaya wizara kustushwa na hali hiyo na kuamua kuunda kamati ya uchunguzi upungufu na  mianya iliyokuwa ikitumika.

Amesema hivi sasa jambo hilo likijitokeza  kwenye gereza lolote, hatua zitaanza kuchukuliwa kuanzia kwa mkuu wa gereza na watumishi wengine watakaokuwa wamehusika au kuzembea kwa namna yoyote ile.

Akizungumza na waandishi wa habari jijini Mwanza akiwa  na uongozi wa Gereza la Butimba, alisema tayari kamati iliyoundwa imekamilisha kazi yake na kukabidhi wizarani  taarifa  na mapendekezo  yake ya namna ya kuthibiti uingizwaji  wa bidhaa haramu gerezani zilizokatazwa.

“Ni kweli hali ya uingizwaji wa bidhaa ndani ya magereza ilitushtua sana kama wizara, ikatubidi kuunda tume ya uchunguzi namna vitu hivyo harama vinavyoingia, lakini nisema mpaka sasa tatizo hilo limepungua na imani yetu litaisha kabisa.

“Angalizo ambalo tumejiwekea ni kwamba ikitokea gereza fulani kumetokea hali hiyo, makamanda na watumishi wengine watawajibika papo hapo, wito wangu ni kuwataka kuwa wakali  kweli kweli, haiwezekani sehemu kama ile kukafanyika biashara haramu, kama wizara tumeyapokea mapendekezo hayo na kuyafanyia kazi.

Hata hivyo Masauni alimtaka Mkuu wa  Gereza  la Butimba, Hamza  Rajabu kumweleza anavyotekeleza ilani ya viwanda anavyoitekeleza ambapo alisema ndani ya gereza hilo kuna kiwanda cha ushonaji nguo na wamekuwa na wakipata kazi mbalimbali kutoka kwa mashirika ya umma na binafsi.

Licha ya kupewa majibu hayo lakini Masauni alisema alichogundua uongozi wa gereza hilo bado hauna mpango mkakati wa kuliwezesha gereza hilo kujitegemea kwa chakula licha ya uwepo na ardhi yenye ukubwa  hekari 479 za kulima mazao mbalimbali ndani ya Mkoa wa Mwanza.

Hata hivyo alisema kama mkuu wa gereza la Butimba, wamejipanga kuanza kujenga nyumba za watumishi kwa kutumia wafungwa hao na hadi sasa wameanza ujenzi wa nyumba mbili huku akiiomba Serikali kuwasaidia au kutekeleza maombi wanayofikisha wizarani.