Halmashauri kuu Yahamasisha kasi ya maendeleo

Posted on: January 24th, 2020

Wajumbe wa Halmashauri Kuu ya  Chama Cha Mapinduzi  Taifa (NEC)  wamefanya ziara ya kukagua  miradi  yote  ya kimkakati katika Mkoa wa Mwanza na kusema kwamba  kama kusingekuwapo na katiba, Mhe. Rais  Dk.John Magufuli angetakiwa kuendelea kuongoza Tanzania hadi pale atakapoona inamfaa kustaafu mwenyewe.

Pia baadhi ya wajumbe  wa NEC walisema itashangaza  endapo itatotokea kada wa Chama Cha Mapinduzi (CCM) atajitokeza kuchukua fomu ya kuwania nafasi ya urais katika uchaguzi ujao wa 2020 kwani itakuwa ni ishara ya kumkwamisha Rais Dk. Magufuli asitimize malengo yake.

Ziara hiyo iliyoongozwa na Katibu wa Itikadi na Uenezi Taifa, Mhe. Humphery Polepole pamoja na Mkuu wa Mkoa wa Mwanza, Mhe.John Mongella ilianzia  ukaguzi wa daraja la juu la watembea kwa miguu la Furahisha,  upanuzi wa barabara Makongoro  inayoanzia  eneo la Ghana hadi  uwanja wa ndege wa Mwanza.

Miradi mingine iliyotembelewa ni  ujenzi wa jengo la kuhifadhia mizigo (Cargo terminal) katika uwanja wa ndege wa Mwanza, jengo la abiria linalojengwa na  Halmashauri ya Manispaa ya Ilemela na Jiji la Mwanza, jengo na mnara wa kuongozea ndege (control tower) pamoja  kipande cha  barabara  ya mita 500 cha  kurukia na kutua ndege  kilichoongozwa kukidhi  kiwnago cha kimataifa.

Vile vile walikagua karakana ya kampuni ya ujenzi wa meli na vivuko ya Songoro Marine 'Transport Boatyard'ambako kunafanyika ujenzi na ukarabati wa vivuko  mbalimbali vya Serikali vikiwamo cha MV Ilemela,  Nyerere, Butiama, Chato na vinginevyo.

Pia walitembelea miradi ya ujenzi wa barabara ya Sabasaba hadi  Buswelu yenye kilomita 9.7, barabara ya Kisesa-Usagara  ya kilomita 16.14,  ujenzi wa daraja la pande mbili za Kigongo-Busisi lenye kilomita 3.2  ambalo hivi karibuni liliwekewa jiwe la msingi na Mhe.Rais Dkt. Magufuli ambapo walimalizia  ukaguzi wa Bandari ya Mwanza Kusini  kuona ujenzi wa chelezo, meli mpya , ukarabati wa MV Victoria na MV Butiama.

Akiwa eneo la Daraja la Furahisha, Mhe.Polepole aliwaeleza wajumbe hao  kutoka Tanzania Bara na Zanzibar kwamba  baadhi ya fedha za   ujenzi wa daraja la Furahisha na upanuzi wa barabara hiyo zilitokana na uamuzi wa Mhe.Rais Dkt. Magufuki kuahirisha maadhimisho ya sherehe za Uhuru  na kuelekeza  kujengwa kwa miundombinu hiyo.

“Daraja hili na upanuzi wa barabara kutoka Ghana hadi uwanja wa ndege  vimejengwa kimkakati,  haiwezekani  mtu anatua na ndege kisha anakaa kwenye foleni, pia hapa tumejenga jengo la biashara la  kimataifa la Rocky City Mall ambapo kuna soko la madini, vile vile kuna uwanja wa mpira wa CCM Kirumba, sasa tunaposema miradi ya kimkakati  tunamaanisha kwa vitendo.

“Hii miradi inayojengwa hapa ni kwa faida ya sisi na vizazi vijazo, ipo ambayo tutaanza kuona  mafanikio kuanzia sasa lakini mingine wajukuu wetu ndiyo watafaidi na wataelezwa na watoto wetu kwamba ilijengwa na Mhe.Rais Dkt. Magufuli, kwa kasi hii ya miaka minne bila shaka CCM  itashinda kwa kishindo 2020 kwa asilimia 100, ushahidi  tumeuona kwenye uchaguzi wa Serikali za mitaa,”alisema.

Aidha Mhe.Polepole  aliwataka wajumbe wa NEC kuona kazi anayofanya Mhe.Rais  Magufuli  na kumsaidia kuwaeleza wananchi popote wanapopata nafasi.

Akizungumza na waandishi wa habari baada ya ziara hiyo, Mwenyekiti wa CCM Mkoa wa Mara, Samwel Kiboye alisema kama  isingekuwapo katiba inayoweka ukomo wa urais, Mhe.Rais Magufuli anastahili kuongoza Tanzania hadi pale anapoona inastahili mwenyewe.

“Binafsi ni muumini sana kwa wale wanaopendekeza  Rais Magufuli  aendelee kuwa  mpaka astaafu mwenyewe,  lakini kwa kuwa kuna katiba  inazuia hilo, amefanya mambo makubwa sana na nimekuwa nikiwaza hata ninapokuwa nimelala hivi ni nani ataendeleza miradi hii pale Magufuli atakapostaafu.

Baadhi ya wajumbe wakiwamo Mhe. Antony Diallo, Gasper Kikao,  Yasmin Alloo na Jamal Babu walipongeza  ujenzi wa miradi ya kimkakati ndani ya Mkoa wa Mwanza ambapo walidai  kuwa ndoto ya Mhe. Rais Magufuli  hakuna wa kuizuia kwani miradi inayojengwa imejibu kero zote za wananchi.

Waliongeza kuwa  miradi hiyo ikikamilika atakuza uchumi wa wananchi, mkoa na taifa kwa ujumla.

Naye Mkurugenzi Mtendaji wa Songoro Marine, Major Songoro alisema kampuni hiyo imepata mageuzi ya haraka kutokana na Serikali ya awamu ya tano kuipatia zabuni nyingi kitendo kilichofanya kuongeza ufanisi katika kazi.