Jenerali Mabeho aiaga Kamati ya Usalama Mwanza

Posted on: June 17th, 2022

Mkuu wa Mkoa wa Mwanza Mhe Mhandisi Robert Gabriel amemshukuru Mkuu wa Majeshi ya Ulinzi na Usalama nchini kwa Utumishi wake Mema kwa wananchi wa Mwanza na amemtakia Afya njema wakati wote hata baada ya Utumishi.

Amebainisha hayo leo Juni 17, 2022 wakati Jenerali Venancy Mabeyo alipofika kushukuru na kuwaaga wananchi wa Mwanza katika kuelekea kustaafu kwake kwa Utumishi ndani ya Jeshi hilo hapo Julai 2022.

"Wananchi wa Mwanza wanakukumbuka sana kwa namna ulivyoshiriki wewe binafsi kwenye Operesheni ya Uokoaji iliyokua na ufanisi mkubwa iliyofanyika baada ya kuzama kwa Kivuko cha MV Nyerere tarehe 20 Septemba 2018 katika kata ya Bwisya Kisiwani Ukara-Ukerewe Mkoani Mwanza". amesema Mkuu wa Mkoa.

"Ndugu Mkuu wa Majeshi, Wana Mwanza  tumeridhika na tunashukuru kwa utumishi wako na tunamuomba mwenyezi Mungu akuangazie mwanga mwingine kwenye maisha yako yote" Mhe Gabriel.

Jenerali Venancy Mabeyo, Mkuu wa Majeshi ya Ulinzi na Usalama amesema amefika Kanda ya ziwa kuwasalimia na kuwaaga rasmi kwani anafikia mwisho wa Utumishi kwenye Jeshi alilojiunga tangu 1979.

"Kwangu ni faraja kubwa kwamba nimeishi katika nafasi na maeneo mbalimbali, nimejenga familia kama mtumishi ndani ya jeshi na nje ya jeshi na karibu watanzania wote nimeishi nao katika misingi ya kulinda mipaka ya nchi na mali zao." Amebainisha.

"Nafarijika mno kwamba mmenipa nafasi nije niwaage, kanda ya ziwa ndio nyumbani na wengi wangependa wanione na sasa nimekamilisha mzunguko wa Machweo na Mawio na sasa jua linazama kwenye maisha ya kijeshi ambayo nimekaa kwa muda mrefu." Mkuu wa Majeshi.

Aidha, Jenerali Mabeyo amewaasa vyombo vya ulinzi na watumishi kuendelea kushirikiana na ametumia wasaa huo kuwashukuru huku akibainisha kuwa wamemlea na kumuwezesha kufanya kazi kwa utulivu.

"Nitarudi kijijini nilikozaliwa lakini nitakua na fursa za kuzunguka hapa na pale ili nishirikiane na wananchi wenzangu na kwakweli navishukuru sana vyombe vingine vya ulinzi na usalama kwani wamenipa ushirikiano mkubwa sana na ndio maana afya yangu bado ni nzuri kutokana na utulivu na ushirikiano." amesema.