JESHI LA ZIMAMOTO NA UOKOAJI LAUDHIBITI MOTO ULIOIBUKA JIJINI MWANZA

Posted on: October 30th, 2023

JESHI LA ZIMAMOTO NA UOKOAJI LAUDHIBITI MOTO ULIOIBUKA JIJINI MWANZA

Jeshi la zimamoto na uokoaji Mkoani Mwanza limefanikiwa kudhibiti moto uliozuka kwenye sehemu ya juu ya jengo la ghorofa moja la biashara  lililoko mtaa wa Karuta Jijini Mwanza.

Akizungumza kwa niaba ya Mkuu wa Mkoa wa Mwanza baada ya kufika kwenye eneo  la tukio hilo, Mkuu wa wilaya ya Nyamagana Mhe. Amina Makilagi ameviagiza  vyombo vinavyohusika na majanga na uokozi Mkoa huo  kuchunguza na kubaini chanzo cha moto huo mara moja ili hatua zaidi zichukuliwe.

Mhe Makilagi ametoa rai kwa wafanyabiashara mkoani humo  kuhakikisha wanasajiri biashara zao kwenye Bima ili kuwa na usalama wa mali zao panapotokea majanga kama hayo.

Aidha, amelitaka jeshi la zimamoto kutoa elimu kwa wananchi ili waweze kubaini kwa namna gani wanaweza kujilinda na majanga ya moto pindi  yanapotokea.

Naye, Mkuu wa jeshi la polisi Mkoa wa Mwanza Willbroad Mutafungwa amesema jeshi hilo lilifika kwenye eneo la tukio na kuhakikisha usalama wa mali za wafanyabiashara katika eneo hilo.

Halikadhalika, Kaimu Mkuu wa Jeshi la Zimamoto na uokoaji Mkoani humo Kamila Labani amesema wamefanikiwa kuuzima moto huo ili usilete madhara katika majengo mengine yaliyokuwa karibu na jengo  hilo huku  wakiendelea kuchunguza chanzo cha kuzuka kwa moto huo.