Mwanafunzi aliyetekwa Mwanza akutwa Lamadi amejiteka

Posted on: April 30th, 2019

Taharuki  iliyokuwa imetanda Jiji la Mwanza juu ya mwanafunzi  wa kidato cha pili  Shule  ya  Mtakatifu Mary’s  Apostos, Yela Cosmas (17)  kutekwa na watu wasiojulika huku  wakiwataka wazazi wake kutuma fedha  haraka vinginevyo wangempeleka  nchini  Zambia amekamatwa na Jeshi la Polisi akiwa amejiteka.

Ujumbe wa kutekwa kwa mwanafunzi huyo ulianza kusambaa juzi kwenye mitandao ya kijamii  kupitia namba mpya ya simu  0689447247 ikiwa ni masaa machache baada ya wazazi wake kumsindikiza  na kumpandisha  basi la Sheraton kwenda shuleni.

Akizungumza na waandishi wa habari, Kamanda wa Polisi Mkoa wa Mwanza, Jumanne Murilo alisema tukio hilo lilitokea juzi na  baada ya taarifa  hiyo kuwafikia  walianza kazi ya kufuatilia kwa   kutumia kikosi maalumu walifanikiwa kumpata  mwanafunzi huyo  Lamadi  mkoani Simiyu akiwa amejiteka lengo ni kupata fedha kutoka kwa wazazi wake.

“Mwanafunzi huyu  alisindikizwa na wazazi wake hadi kituo cha Buruzuga na kupandishwa basi la Sheraton linalofanya safari zake kati ya Mwanza-Geita lakini baadaye alishuka na kusajili namba mpya  ya simu  0689447247 ambayo wazazi wake hawaijui, ujumbe ule uliwataka wazazi  fedha bila kutaja kiasi ili mtoto aachiwe kwani ametekwa vinginevyo angepelekwa nchini Zambia.

“Jeshi la polisi lilifuatilia  tukio hilo kwa ukaribu kwa kutumia kikosi maalum na kumtia nguvuni mwanafunzi huyo  Lamadi mkoani Simiyu akiwa salama na tunamshikilia ili kufanya mahojiano na baadaye tutamfikisha mahakamani kwani kitendo alichokifanya ni kinyume na sheria za nchi, tunaomba wanafunzi wenye nia kama hiyo waache haraka sana,”alisema Murilo.

Wakati huo huo polisi inamshikilia  Lazaro Isaack (32) Mkazi wa Machinjioni mkoani Mwanza kwa kosa la  kughushi nyaraka mbalimbali za Serikali, wizi kwa njia ya mtandao, kutapeli watu kwa kisingizio cha kutopata ajira, kujifanya mtumishi wa Serikali.

Kamanda  Murilo alisema  mtuhumiwa huyo alikamatwa juzi akiwa na kitambulisho cha kazi kutoka Vodacom Cap View  Ltd  na baada ya kufanya upekuzi katika makazi yake alikutwa na nakala 34 za TIN  kutoka Mamlaka ya Mapato Tanzania (TRA) za mikoa ya Mwanza, Pwani, Dar es Salaam, Dodoma, Geita, Kagera, Mtwara na Shinyanga.

Murilo alisema mtuhumiwa huyo alikutwa na vifaa vingi  zikiwamo fomu za Serikali ambazo ziliwafanya watu  wengi kuamini ni mtumishi wa Serikali na kuwatepeli kirahisi kwa kumpatia pesa ambapo polisi inaendelea kuchunguiza mtandao huo ili kuwabaini wanaoshirikiana katika mtandao huo.