RC Mongella atekeleza kwa Vitendo agizo la Mhe.Rais

Posted on: August 18th, 2018

Mkuu wa Mkoa wa Mwanza Mhe.John Mongella ametekeleza agizo lililotolewa na Mhe. Rais Dkt.John Pombe  Magufuli juu ya kuhakikisha anasimamia na kuyafanyia maamuzi  malalamiko ya wafanyabiashara wadogo Maarufu Machinga wilayani Sengerema.

Hii ni kufuatia maagizo ya Mhe.Rais Dkt.John Magufuli baada ya kupita Wilaya ya Sengerema akielekea Wilaya ya Chato kwa ajili ya mapumuziko na kusimama kwa ajili ya kuwasalimia, ndipo walipotoa malalamiko kuwa mnamo tarehe 10.8.2018  ilifanyika operation ya kuwaondoa wafanyabiashara ndogondogo, hiyo ilipelekea wafanyabiashara  wa nanasi 11 wanaofanya biashara ya kuuza nanasi kandokando ya barabara  kuchukuliwa na Halmashauri katika oparesheni hiyo.

Mhe.Mkuu wa Mkoa amemtaka mkurugenzi kulifanyia marekebisho soko lililipo karibu na eneo wanalouzia nanasi kwa sasa  kwa kujenga mabanda ya nguzo za mabomba yatakayoezekwa  kwa mabati ili kuwatengenezea kivuli baada ya hapo wafanyabiashara hao washirikishwe katika kupanga na kuhamia katika eneo hilo.

"Ifikapo jumatatu tarehe 20/08/2018 wale  watu 11 waliochukuliwa biashara zao za nanasi waitwe  na  wafidiwe fedha kwa nanasi zao kuchukuliwa  kwa jinsi watakavyokuwa wamekubaliana na ifikapo jumatano tarehe 22/08/2018 wawe wamelipwa fidia yao,"alisema Mongella.

Aidha Mhe Mongella  amemuagiza mkurugenzi huyo kuwa maafisa maendeleo ya jamii watumike kwenda kwenye jamii kuwaelewesha na kuelimisha jamii kuhusu umuhimu wa masuala  mbalimbali yenye tija kwa kjamii na  sio watu  wa mapato ambao kazi yao ni kukusanya mapato.

Naye Jacob Mlinga mmoja kati ya wananachi walioathirika na kuchukuliwa nanasi zao na watendaji wa Halmashauri ya Sengerema amemwambia Mhe. Mkuu wa Mkoa kuwa alichukuliwa nanasi 700 yaliyokuwa kwenye matoroli mawili, ambapo baada ya  kumsikiliza aliwaelekeza yeye na wenzake kwenda ofisini kwa mkurugenzi ambapo tatizo lao litashughulikiwa.

Kwa upande wake mfanyabiashara mwingine Elina Taibu anayejishughukisha na biashara ya umachinga amemshukuru Mhe.Rais John Pombe Magufuri kwa kuwajali wanyonge na ameomba aendelee kuwatetea na kushughulikia matatizo ya watu wa chini.

Hata hivyo Mkurugenzi wa Halmashauri hiyo Magesa Mafuru Boniface amewataka wafanyabishara waendelee kutoa ushirikiano kuhamia katika eneo lililotengwa la kisima cha chumvi, pia  amempongeza Mhe. Rais kwa kusikiliza kero za wananchi wa Sengerema na kuahidi kutekeleza maagizo yote aliyoagizwa kuyatekeleza katika kushughulikia tatizo la wafanyabiashara  

hao.