TCCIA Yaiomba Serikali kufanya uwekezaji wa Kimataifa viwanja vya Nyamuhongolo

Posted on: August 18th, 2019

CHEMBA  ya Wafanyabiashara,wenye Viwanda na Kilimo Tanzania (TCCIA) imeiomba Serikali kuipatia  eneo la Nyamhongolo jijini Mwanza ambalo limekuwa likitumika katika maonyesho ya  wakulima maarufu nane nane ili kuliwekeza katika hadhi ya kimataifa.

Ombi hilo lilitolewa  na Mwenyekiti wa TCCIA Mkoa wa Mwanza, Dkt. Elibariki Mmari wakati akizungumza na waandishi wa habari juu ya ufunguzi wa maonyesho ya  14 ya Afrika Mashariki   yanayotarajiwa kuzinduliwa Agosti 30, mwaka huu na Waziri  wa Viwanda na Biashara,Mhe. Innocebt Bashungwa.

Dkt. Mmari amesema  maonyesho hayo  yanafanyika katika viwanja vya jengo la Biashara la Kimataifa la Rocky City Mall jijini Mwanza ambapo nchi za Kenya, Uganda,Rwanda, Indonesia, India, Syria, China na kampuni 300  zimethibitisha kushiriki.

Ameongeza kuwa TCCIA imekuwa katika changamoto ya muda mrefu ya kupata eneo la kudumu la  uwekezaji  kwa ajili ya maonyesho hayo ambapo ilifanya mazungumzo  ya awali na uongozi wa Mkoa wa Mwanza lakini walishindwa kufikia muafaka kuwapo na mpango wa maonyesho ya nanenane kikanda.

“Kama Serikali itatupatia pale Nyamhongolo tuna uwezo wa kujenga majengo yenye hadhi ya kimataifa na shughuli zitakuwa zikifanyika kwa mwaka mzima badala ya kusuburia nanenane, tutakachofanya   ni kuzingatia mahitaji  makundi yote ambapo  wale watakaokuwa wanahitaji eneo ni kulipia kama kawaida.

“Awali tulifanya mazungumzo na viongozi wa mkoa lakini kukawa na taarifa ya maonyesho ya nanenane yanatakiwa kuhamia Mwanza ambapo mpango huo ulishindikana na kuwapo mgawanyo, sote ni mashahidi wengine wanafanyia Simiyu, mikoa mingine hapa Mwanza.

“Bado tunafuatilia suala hili lakini tunaiomba Serikali itupatie lile eneo ili tulifanyie uwekezaji mkubwa na kuwa na hadhi ya kimataifa ili mataifa yanayohudhuria maeonyesho yetu yawe na uhalisia wa kile tunachokifanya, kwanza mapato ya nchi yatapatikana kwa urahisi na shughuli zitakuwa zikifanyika muda wote wa mwaka kama ilivyo Rocky City Mall,”alisema.

Dkt. Mmari alisema maonyesho ya mwaka huu yatakuwa tofauti na miaka mingine kutokana na mataifa makubwa  nje ya Afrika Mashariki kushiriki ambapo mapungufu yote yaliyojitokeza mwaka jana yamefanyiwa kazi huku akiwataka wananchi kujitokeza kutembelea kwani kutakuwapo na wanyama wakiwamo simba, fisi,chui, ngamia na wengine ambao watapata fursa ya kuwaona na kupiga picha.

Dkt. Mmari alisema miongoni mwa fursa zitakazopatikana kutokana na maonyesho hayo ni kuimarisha mtandao wa masoko na usambazaji bidhaa,  kampuni za Tanzania kujifunza na kutanua wigo wa biashara kwa kutumia makubaliano ya kibiashara ya kimataifa.

Vile vile alisema kufanyika maonyesho hayo yanatoa mchango kwa vitendo katika kuunga mkono juhudi za Rais Dkt. John Magufuli kuifanya Tanzania ya viwanda na uchumi wa kati ifikipo 2025 sambamba na kuimarisha mtengamano wa soko la pamoja la Afrika Mashariki.

Hata hivyo alipiga marufuku baadhi ya bidhaa zikiwamo silaha za moto na milipuko, masuala ya siasa na dini hayaruhusiwi katika maonyesho hayo huku akiwataka kampuni na watu binafsi wanaotaka kuwa wadhamini katika shughuli hiyo kujitokeza kabla ya Agosti 25, mwaka huu.

Alisema maonyesho hayo yatakuwa na zawadi kwa washindi katika makundi mbalimbali yakiwamo   wahandisi,  kilimo, viwanda, chakula, dawa na makundi maalum ambapo aliwataka washiriki kutambua jopo la majaji litaanza kupita kwenye mabanda yao kuanzia Agosti 31 hadi Septemba Mosi mwaka huu.