Watumishi wa Afya ongezeni bidii katika kuwahudumia wananchi: RAS Mwanza

Posted on: December 29th, 2023

Watumishi wa Afya ongezeni bidii katika kuwahudumia wananchi: RAS Mwanza

Katibu Tawala wa Mkoa wa Mwanza Ndugu Balandya Elikana amefanya ziara ya kikazi  kwenye Kituo cha Afya Igoma kwa lengo la kuwasikiliza watumishi na kupata maoni yao kuhusu kuboresha utendaji kazi na mazingira ya kufanyiakazi.

Akizungumza na watumishi hao Alhamisi  hii, Ndugu Balandya amesema kada ya afya ni nyeti ambayo inagusa uhai wa mwanadamu hivyo watumishi hao ni lazima watangulize viapo vyao kwa kufanya kazi kwa weledi.

"Leo nimefika hapa mahsusi kwa ajili ya kuja kuwasikiliza ninyi na ndio maana sikuwa na hotuba," alisema Balandya.  Nimewasikia changamoto zinazowakabili ambazo nyingi ni za kuboresha mazingira yenu ya kazi, nawaahidi zitafanyiwa kazi haraka na Mkurugenzi wa Jiji atalisimamia hilo na kunipa taarifa pia maafisa utumishi shughulikieni changamoto za Watumishi kwani nyingi siyo tatizo tena zipo ndani ya uwezo wenu," amefafanua Mtendaji huyo.

Kwa upande wake Muuguzi Mkuu wa Mkoa wa Mwanza ambaye ni Kaimu Mganga Mkuu wa Mkoa Bi.Claudia Kaluli amewataka watumishi hao kubadilika na kufanya kazi kwa bidii kutokana na tathmini iliyofanywa kuonesha utendaji wa kazi usioridhisha kwa kituo hicho cha Afya.

"Niwaombe sana watumishi wenzangu,tangulizeni uzalendo haya malalamiko ya wananchi hayaleti sura nzuri kwa kada yetu ya afya,"Kaluli

Miongoni mwa changamoto zinazowakabili watumishi hao wa kituo cha afya Igoma ni pamoja na kuchelewa kupanda vyeo, kubadilishiwa kada, kuchelewa kulipwa stahiki za likizo na uhamisho, kukosekana kwa umeme wa uhakika japo Kangavuke ipo pamoja na kuongezewa eneo la kituo hicho na kuboreshewa barabara ya kuingia kituoni.